އައްޑު އަށް ކަރަންޓްގެ ހިދުމަތް ދޭ އަންނަ ފެނަކަ ކޯޕަރޭޝަން ވަނީ ފެއިލްވެފައި ކަމަށާއި ސްޓެލްކޯ ފަދަ އެކަން ކުރެވޭނޭ އެހެން ބަޔަކާ އެކަން ޙަވާލު ކުރުމަށް އައްޑު އަށް ނިސްބަތްވާ ރައްޔިތުންގެ މަޖިލީހުގެ އެމްޑީޕީ މެންބަރުން މިއަދު ގޮވާލައްވައިފި އެވެ.
އެމްޑީޕީ އޮފީހުގައި ބޭއްވި ޕްރެސް ކޮންފަރެންސެއްގައި އައްޑޫ މީދޫ ދާއިރާގެ މެންބަރު ރޮޒައިނާ އާދަމް (ރޮޒޭ) ވިދާޅުވީ ފެނަކަ އައްޑު އަށް ކަރަންޓް ދޭން ފެނަކައިން ހަވާލުވި ދުވަހުން ފެށިގެން ވެސް އައްޑު އަށް އެކަށީގެންވާ ގޮތަކަށް ޚިދުމަތް ނުދެެވޭ ކަމަށެވެ.
އޭނާ ވިދާޅުވީ ސްޓެލްކޯއިން ފެނަކަ އަށް ވުރެ އަގުހެޔޮކޮށް އައްޑު އަށް ކަރަންޓް ދޭނެ ކަމަށް ބުނެފައިވާ ކަމަށާއި އިތުރު ކޮރަޕްޝަންތަކާ އެކު ފެނަކަ ކޯޕަރޭޝަނުން އެ ޚިދުމަތް ދޭން މަސައްކަތް ނުކޮށް ސްޓެލްކޯއަށް އެކަން ޙަވާލް ކުރުން މާ ރަނގަޅު ކަމަށެވެ.
ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) މިއަދު ވިދާޅުވީ ރައްޔިތުން ކަންބޮޑުވެގެން އުޅެނީ ކަރަންޓް 24 ގަޑިއިރަށް ޔަޤީން ނުވެގެން ކަމަށާއި ރަނގަޅު ޕްލޭނެއް ނެތި ވަގުތީ ހައްލެއް ހޯދައި ދިނުމަކީ ޚަރަދު ބޮޑުވެ ރައްޔިތުންނަށް ދިމާވާ ތަކުލީފްތައް އިތުރުވެގެންދާނެ ކަމެއް ކަމަށެވެ.
"މިހާރު ވެސް ޚިދުމަތް ދެމުންދާ ގޮތުން ގާތްގަނޑަކަށް ސާޅީހަކަށް ޕަސންޓް ޚަރަދު ދަނީ ބާކީވެގެން. މީގެ އިތުރުން ހަތަރު ޖަނަރޭޓަރެއް އެއްފަހަރާ ހަލާކުވެގެން ދާނީ ބެލެހެއްޓުންތެރިކަން ވަރަށް ކުޑަވެގެން،" އޭނާ ވިދާޅުވި އެވެ.
ހިތަދޫ ދެކުނު ދާއިރާގެ މެންބަރު ޢަލީ ނިޒާރު ވިދާޅުވީ އައްޑުއަކީ ފައިދާ ލިބިގެން ފެނަކައިން ކަރަންޓުގެ ޚިދުމަތް ފޯރުކޮށް ދެމުންދާ ތަނެއް ކަމަށެވެ. އެހެން ނަމަވެސް ފެނަކަ އަށް އެކަން ނުވާ ކަމަށްވާ ނަމަ އެކަން ކުރެވޭނެ ބަޔަކަށް ދޫކޮށްލުމަށް ގޮވާލެއްވި އެވެ. ކަމަށެވެ.
ނިޒާރު ވިދާޅުވި ގޮތުގައި ތިރީހަކަށް މިލިއަންގެ އިންވެސްޓެއްކޮށްގެން އަމިއްލަ ބަޔަކު ވެސް އެ ޚިދުމަތް ދީފާނެ އެވެ.
ހިތަދޫ މެދު ދާއިރާގެ މެންބަރު އަދި ކުރީގެ ބްރިގޭޑިއަރ ޖެނެރަލް ރިޓަޔާޑް އިބްރާހީމް މުހައްމަދުދީދީ ވިދާޅުވީ މީގެ 40 އަކަށް އަހަރު ކުރިން ފެށިގެން ވެރިކަން ކުރި ބަޔަކު ނުކޮށް ހުރި ކަމެއްގެ ސަބަބުން އައްޑު އަށް ރަނގަޅު ކަރަންޓް ޚިދުމަތެއް ނުދެވުމަކީ އެކަން ނުކުރުމުގެ ހުއްޖަތެއް ނޫން ކަމަށެވެ. އަދި މިހާރު މިއޮތް ސަރުކާރަކީ އެކަންކަން ކޮށްދޭނެ ކަމަށް ވައުދުވެ 24 ގަޑިއިރު ކަރަންޓް ޔަޤީންކޮށް ދިނުމަށް ވެރިކަމަށް އައި ސަރުކާރެއް ކަމަށް ވިދާޅުވި އެވެ.