ރަންބީރު ކަޕޫރާއި އާލިއާ ބަޓް، ސުހަ ހީރޯ ފިލްމަކަށް ސޮއި ކުރި ވާހަކަ ކަރަން ޖޯހަރް ޓްވިޓާގައި އިއުލާން ކުރީ 2014 ގަ އެވެ. އެކަމަކު އޭގެ ފަހުން ތިން އަހަރެއްހާ ދުވަސްވެގެން ދިޔަ އިރު، ފިލްމުގެ މަސައްކަތް ނުފެށި، ފިލްމްގެ ނަން ވެސް އޮތީ ރަސްމީކޮށް އިއުލާން ނުކޮށެވެ.
މީޑިއާތަކުން ރިޕޯޓް ކުރަމުން ދިޔަ ގޮތުގައި 2013 ގައި "ޔެ ޖަވާނީ ހޭ ދީވާނީ" ގެނެސް ދިން ޒުވާން ޑައިރެކްޓަރު އަޔާން މުކަރްހީގެ މި ފިލްމްގެ ނަމަކީ "ޑްރަގަން" އެވެ.
އެކަމަކު އެއީ ފިލްމްގެ ނަން ނޫންކަން އެންމެ ފަހުން މިއޮތީ އިއުލާންކޮށްފަ އެވެ. ރާއްޖޭގައި މިހާރު ޗުއްޓީ ހޭދަ ކުރަމުން އަންނަ އަމީތާބް ބައްޗަން ވެސް މުހިއްމު ރޯލެއް ކުޅޭ މި ފިލްމްގެ ނަމަކީ "ބްރައްމަސްތުރާ" އެވެ.
A TRILOGY …A FANTASY ADVENTURE….A LABOUR OF LOVE…..”BRAHMĀSTRA” pic.twitter.com/8yQ2Y0yWaD
— Karan Johar (@karanjohar) October 11, 2017
ކަރަންގެ ދަރްމާ އިން ގެނެސްދޭ މި ފިލްމާ ބެހޭ ތަފުސީލާ އެކު އޭނާ ކުރި ޓްވީޓެއްގައި ބުނީ "ބްރައްމަސްތުރާ" ސިނަމާތަކަށް އަންނާނީ އޮގަސްޓް 15، 2019 ގައި ކަމަށެވެ. މިއީ ފެންޓަސީ އެޑްވެންޗަ ޓްރިލޮޖީއެކެވެ.
"ބްރައްމަސްތުރާ" އަކީ ދަރްމާ އާއި ފޮކްސް ސްޓާ ސްޓޫޑިއޯ ގުޅިގެން ގެނެސްދޭ ފިލްމެކެވެ. މި ފިލްމަކީ "ވޭކް އަޕް ސިދް" ވެސް ގެނެސް ދިން އަޔާންގެ ތިން ވަނަ ޑައިރެކްޝަނެވެ.
އަދި "ބްރައްމަސްތުރާ" ވެގެން ދާނީ ރަންބީރާއި އާލިއާގެ ޖޯޑު ސްކްރީނުން އެކުގައި ފެންނަ ފުރަތަމަ ފިލްމަށެވެ.