ޑިފެންސް މިނިސްޓަރުޔ އާދަމް ޝަރީފް ޢުމަރު، ސިފައިންނާ ރޭ ބައްދަލުކުރައްވައިފި އެވެ.
ރޭ ކަޅުތުއްކަލާކޮށީަގއި މި ރަސްމިއްޔާތުގައި ޑިފެންސް މިނިސްޓަރު ވަނީ މި ފަހުން ސިފައިން ކޮށްފައިވާ މުހިއްމު ބައެއް މަސައްކަތްތަ ފާހަގަ ކުރައްވައިފަ އެވެ. އެގޮތުން ރަސްރަނި ބަގީޗާގެ މަސައްކަތް ފާހަގަކޮށް އެ މަސައްކަތް އެހާ ކުރު މުއްދަތެއްގެ ތެރޭގައި، ސިފައިން ކޮށް ނިންމާލުމަކީ ހުރިހާ ސިފައިންނަށްޓަކައި ފަޚުރުވެރިވާ ކަމެއް ކަމަށް ވިދާޅުވިއެވެ.
އަދި ސިފައިން މިއަދު ސާބިތުކޮށް ދިނީ ކުރީގެ ޖީލުތަކުގެ ސިފައިންނެކޭ އެއްގޮތަށް ޤައުމީ ބޮޑެތި ކަންކަމުގައި ދިވެހި ރައްޔިތުންނަށް ހުރި ހަރުދަނާ ނަމޫނާ އެއްކަމަށް މިނިސްޓަރު ވިދާޅުވިއެވެ.
މިނިސްޓަރު އާދަމް ޝަރީފް ވިދާޅުވީ ސިފައިންގެ ވެލްފެއާ ކަންކަން ރަނގަޅު ކުރުމަށް ގިނަ ގުނަ މަސައްކަތްތެއް ކުރެވެމުންދާ ކަމަށާއި ސިފްކޯ ހިޔާ ފްލެޓްގެ މަސައްކަތްތައް ވެސް ހަލުވިކަމާ އެކު ކުރިއަށްދާ ކަމަށެވެ. އަދި ހުއްޓުމެއްނެތި އެފަދަ ބޮޑެތި މަސައްކަތްތައް ކުރެވެމުން ދަނީ ރާއްޖޭގެ ރައީސް ޢަބްދުﷲ ޔާމީން ސިފައިންގެ ކަންތައްތައް އެއް ދުވަހުން އަނެއް ދުވަހަށް ރަނގަޅުކޮށް ފުރިހަމަ ކުރުމަށް ދެއްވާ އިރުޝާދާ އެކުގައި ކަމަށް ވިދާޅުވެ ހުރިހާ ސިފައިންގެ ނަމުގައި ޔާމީނަށް ޝުކުރު އަދާ ކުރެއްވި އެވެ.