ސިޔާސީ ޕާޓީތަކަށް ދައުލަތުން ދޭން ޖެހޭފައިސާ ނުދީ ލަސްކުރަމުންދާތީ އެމްޑީޕީން ދައުލަތާ ދެކޮޅަށް ދަޢުވާކޮށްފި އެވެ.
މި މައްސަލަ އެ ޕާޓީން ކޯޓަށް ވެއްދީ އިއްޔެ އެވެ.
އެމްޑީޕީން ހުށަހެޅީ ދައުލަތުގެ އިދާރާއެއް ހިމެނޭ އިދާރީ ޠަބީޢަތުގެ ދަޢުވާއެއްގެ ގޮތުގައި އެދިފައި ވަނީ، ސިޔާސީ ޕާޓީގެ ޤާނޫނުގެ ދަށުން މި އަހަރު އެ ޕާޓީއަށް ލިބެން ޖެހޭ ހަތް މިލިއަނަށް ވުރެ ގިނަ ރުފިޔާ ހޯދައި ދިނުމަށެވެ.
ސިޔާސީ ޕާޓީގެ ގާނޫނުގެ 35 ވަނަ މާއްދާގެ (ޅ) ގައި ބުނެފައި ވަނީ ސިޔާސީ ޕާޓީތަކަށް ދައުލަތުގެ ބަޖެޓުން ދޭ ފައިސާގެ އެހީ، ދައުލަތުގެ ބަޖެޓު ނިސްބަތްވާ އަހަރުގެ ފުރަތަމަ ތިން މަސް ދުވަހުގެ ތެރޭގައި ސިޔާސީ ޕާޓީތަކާ ހަވާލުކޮށް ނިންމަން ވާނެ ކަމަށެވެ.
މިއަހަރުގެ ފުރަތަމަ ތިން މަސް ނިމި، އަހަރުގެ ފަހު ތިން މަސް ފެށިފައިވާއިރު ޕާޓީތަކަށް ފައިސާ ދޫކުރާނެ ދުވަހެއް ފިނޭންސް މިނިސްޓްރީން ނުބުނެއެވެ. މިދިޔަ އަހަރުވެސް ޕާޓީތަކަށް ފައިސާ ދޫކޮށްފައި ވަނީ ގާނޫނުގައި ބުނާ ތިން މަސް ދުވަސް ފާއިތުވެ ދިޔަތާ އެތައް މަހެއް ފަހުން ނޮވެމްބަރު މަހު އެވެ.