މަރަދޫފޭދޫ ކުޑަކުދިންގެ ޕާކްގައި ކުދިން ބޭނުން ކުރަން ބަހައްޓާފައި ހުރި ތަކެތި ހަލާކުވެފައި ހުރިކަން އެނގޭ ހެއްޔެވެ؟ ދަރިން ގޮވައިގެން ހިތްހަމަޖައްސާލަން ހަވީރު ފިންޏަށް އެތަނަށް ދާ ނަމަ، އެތަނުގައި ބަހައްޓާފައި ހުރި ތަކެއްޗަށް ސަމާލުވެގެން އުޅޭށެވެ. އެހެން ނޫނީ ދަރިއަކަށް ބޮޑު ގެއްލުމެއް ވެސް ވެދާނެ އެވެ.
މިކަންބޮޑުވުން ސޯޝަލް މީޑިއާގައި މީހަކު ވަނީ އެތައް ބައެއްގެ ސަމާލު ކަމަށް ގެނެސްފަ އެވެ.
"މަރަދޫފޭދޫ ކުޑަކުދިންގެ ޕާކަކީ ވަރަށް ގިނަ ރައްޔިތުން ބޭނުން ކުރަމުންދާ ތަނެއް. މި ޕާކްގެ ބައެއް ސާމާނު ހަލާކުވެ، ބޭނުން ނުކުރެވޭތީ މިކަން ވީ އެންމެ އަވަހަކަށް ހައްލުކޮށް ދިނުން އެދެން،" ހަލާކުވެފައި ހުރި ބައެއް ތަކެތީގެ ފޮޓޯތަކާ އެކު އޭނާ ފޭސްބުކްގައި ލިޔެފައިވެ އެވެ.
އައްޑޫގެ ކުޑަކުދިންގެ ޕާކްތަކަކީ އައްޑޫ ސިޓީ ކައުންސިލުން ހަދާފައިވާ ތަންތަނެވެ. އެހެން ނަމަވެސް މިއިން ތަނަކަށް މިހާރު ކައުންސިލްގެ ބާރެއް ނުހިނގަ އެވެ. ލާމަރުކަޒީ ގާނޫނުން ކައުންސިލަށް ލިބި ދީފައި ހުރި އެތައް ހައްގެއް، ސަރުކާރުން ނަގާފައިވާތީ ރައްޔިތުންނާ ގުޅުން ވަރަށް ގިނަ ކަންކަން ކުރުމަށް ވަނީ ހުރަސް އެޅިފަ އެވެ. ޕާކްތަކުން މި ފެންނަނީ އޭގެ ނަތީޖާ އެވެ.
އެޑިޓަރުގެ ނޯޓް: "މުޖުތަމައު ތެރެއިން" މި ނަމުގައި ކޮންމެ ދުވަހަކު "އައްޑޫ ލައިވް" އިން މި ގެނެސްދޭ ސެގްމަންޓަކީ މުޖުތަމައު ތެރެއިން ފެންނަ އާންމުން ކަންބޮޑުވާ އަދި ނޭދެވޭ ކަންކަން ގިނަ ބައެއްގެ ސަމާލު ކަމަށް ގެނެސް އެފަދަ ކަންކަން ހުއްޓުވުމަށް ބާރު އެޅުމެވެ.