އައްޑޫ ގަން އިންޓަނެޝަނަލް އެއާޕޯޓަށް އިތުރު އިންޓަނަލް ފްލައިޓްތައް އޮޕަރޭޓް ކުރުމަކީ ޝަންގްރިއްލާ ވިލިގިލި ރިސޯޓް އެންޑް ސްޕާ އަށް އަންނާނެ ވަރަށް ބޮޑު ކުރިއެރުމެއް ކަމަށާއި މީގެ ސަބަބުން މި ސަރަހައްދުގެ އެހެން ރިސޯޓްތަކަށް ވެސް އޭގެ ފައިދާ ވަރަށް ބޮޑަށް ކުރާނެ ކަމަށް ވިލިގިލި ރިސޯޓްގެ ޖެނެރެލް މެނޭޖަރު އަލްވިން ޑްރެގޯ ވިދާޅުވެއްޖެ އެވެ.
"ހޮޓެލިއާ މޯލްޑިވްސް" އަށް ދެއްވި އިންޓަވިއުއެއްގައި އޭނާ ވިދާޅުވީ ވިލިގިލި ރިސޯޓަށް މިހާރު ދިމާވެފައިވާ އެންމެ ބޮޑު ގޮންޖެހުމަކީ އައްޑުއާ ހަމައަށް އަންނަ ޓޫރިސްޓުން ދިގު ދަތުރެއް އަދި ބޮޑު ހަރަދެއް ކުރަން ޖެހުން ކަމަަވެ. އަދި އެކަން އެގޮތަށް ދިމާވަނީ ގަމަށް އިންޓަނެޝަލް ފްލައިޓްތައް ނެތުމުން ކަމަށް ވިދާޅުވި އެވެ.
"އެހެންވީމާ ވެލާނާ އެއާޕޯޓާ ހަމައަށް އައިސްފައި އަނެއްކާ އިތުރު ފްލައިޓެއް ނަގައިގެން ގަމާ ހަމައަށް އަންނަން މި ޖެހެނީ،" އަލްވިން ވިދާޅުވި އެވެެ. "މީގެ ސަބަބުން އަސްލު ޓޫރިސްޓުންގެ ދަތުރު ވަރަށް ބޮޑަށް އެބަ ދިގުވޭ."
އޭނާ ވިދާޅުވީ މިކަމަށް ހައްލެއް ލިބޭނީ ގަމުގައި އިންޓަނެޝަނަލް އޮޕަރޭޝަންތައް ފުޅާކޮށްކޮށްގެން ކަމަށެވެ. މި ވަގުތު ކަމަށް އޮޕަރޭޓް ކުރާ ހަމައެކަނި ބޭރުގެ އެއާލައިނަކީ ސްރީ ލަންކަން އެއާލައިންސެވެ.
"އެ އެއާލައިންސްގެ އޮޕަރޭޝަންތައް ގަމަށް ފެށުމުގައި އަޅުގަނޑުމެންގެ ވަަރަށް ބޮޑު ހިއްސާއެއް ވާނެ،" އަލްވިން ވިދާޅުވި އެވެ. "އިންޓަނެޝަނަލް އޮޕަރޭޝަންތައް އިތުރުވުމަކީ ޝަންގްރިއްލާގެ އިތުރުން މުޅި އައްޑޫގެ ޓޫރިޒަމާއި މި ސަރަހައްދުގެ އެހެން ރިސޯޓްތަކަށް ވެސް އަންނާނެ ކުރިއެރުމެއް ކަމަށް އަޅުގަނޑު ދެކެނީ."
ރާއްޖޭގައި ހިންގާ އެންމެ މަތީ ފަންތީގެ ރިސޯޓްތަކުގެ ތެރޭގައި ހިމެނޭ ޝަންގްރިއްލާ ވިލިގިލި ރިސޯޓް އެންޑް ސްޕާގެ މުވައްޒަފުންނާ ބެހޭ ގޮތުން އަލްވިން ވިދާޅުވީ އެތަނުގައި މަސައްކަތް ކުރާ މުވައްޒަފުންގެ 60 ޕަސަންޓަކީ ދިވެހިން ކަމަށެވެ.
"ދިވެހިން ކަމަށް ވިޔަސް ބޭރު މީހުން ކަމަށް ވިޔަސް މި ތަނުގެ ކޮންމެ ދާއިރާއެއްގައި ވެސް މަސައްކަތް ކުރާނީ ކޮލިފައިޑް މުވައްޒަފުން. އެ މީހުން ތަމްރީނު ކުރުމަށް ކުންފުނިން އަބަދު ވެސް ވަރަށް ބޮޑު އިސްކަމެއް ދޭ،" އޭނާ ވިދާޅުވި އެވެ.
އަލްވިން ވިދާޅުވީ ރިސޯޓްގެ މުވައްޒަފުންގެ ތެރެއިން 80 މުވައްޒަފުންނަށް މިހާރު ވެސް އެމެރިކާގެ ހަވާޑް ޔުނިވަސިޓީގެ ޕްރޮގްރާމްތައް އޮންލައިންކޮށް ހެދުމުގެ ފުރުސަތު ދީފައިވާ ކަމަށެވެ. އަދި ޝަންގްރިއްލާ އިން އެހެން ގައުމުތަކުގައި ހިންގާ ރިސޯޓްތަކާއި ހޮޓާތަކަށް މުވައްޒަފުން ފޮނުވައިގެން ވެސް އިތުރު ތަމްރީނު ދޭ ކަމަށް ވިދާޅުވި އެވެ.
ޝަންގްރިއްލާ ވިލިގިލި ރިސޯޓް އެންޑް ސްޕާއަކީ 2009 ގައި ހުޅުވި ރިސޯޓެކެވެ.