ކޮންޓްރެކްޓަ ފައިނޭންސް އުސޫލްގެ ދަށުން ފޭދޫގައި 100 ހައުސިން ޔުނިޓް އަޅަން ފިނޭންސް މިނިސްޓްރީން މިއަދު ބީލަމަށް ލައިފި އެވެ.
އެ މިނިސްޓްރީން ބުނީ މި މަޝްރޫއުގައި ބައިވެރިވާން ބޭނުންވާ ފަރާތްތަކަށް ބީލަމުގައި ބައިވެރިވުމުގެ ފުރުސަތު އަންނަ މަހުގެ 21 އާ ހަމައަށް ހުޅުވާލާފައިވާ ކަމަށެވެ. އެގޮތުން ބީލަމުގައި ބައިވެރިވާން 1،500ރ. ގެ ފީއަކާ އެކު ރަޖިސްޓްރީ ވާން ޖެހެ އެވެ.
ފިނޭންސުން ބުނީ ބީލަމަށް ކުރިމަތިލާ އިރު، މި މަޝްރޫއުގެ ބިޑް ސެކިއުރިޓީގެ ގޮތުގައި 250،000ރ. ހުށަހަޅަން ޖެހޭ ކަމަށާއި ބިޑް ސެކިއުރިޓީގެ މުއްދަކީ ބިޑް ހުޅުވާ ދުވަހުން ފެށިގެން 148 ދުވަސް ކަމަށެވެ.
ބިޑް ހުޅުވުން އޮންނާނީ އަންނަ މަހުގެ 23 ގަ އެވެ. މިކަމާ ބެހޭ މައުލޫމާތެއް ހޯދަން ބޭނުން ނަމަ އަންނަ މަހުގެ 9 ގެ ކުރިން އީލެއިލަކުން އަންގަން ޖެހެ އެވެ. އަދި އިތުރު މައުލޫމާތު 3349102 އަދި 3349106 އިން ލިބޭނެ އެވެ.
މި ސަރުކާރުގެ ސޯޝަލް ހައުސިން ސްކީމްގެ ދަށުން ފޭދޫގައި 100 ހައުސިން ޔުނިޓް އަޅަން ނިންމި އިރު، ކުރީގެ ރައީސް މުހައްމަދު ނަޝީދުގެ ވެރިކަމުގައި ފޭދޫގައި ވަނީ 25 ހައުސިން ޔުނިޓް އަޅާފަ އެވެ. އަދި އެތަންތަނުގައި މީހުން އަންނަނީ ދިރިއުޅެމުންނެވެ.
މި ސަރުކާރުން ހިތަދޫގައި 264 ފްލެޓް އަޅާފައިވާ އިރު ހުޅުމީދޫގައި ވަނީ 48 ފްލެޓް އަޅާފަ އެވެ.