ޑައިރެކްޓަރު ލޭކް ޓަންޑަން މަރުވެއްޖެ

"އަމްރަޕާލީ" ފަދަ ފިލްމްތައް ބެލުންތެރިންނާ ހަމައަށް ގެނެސް ދީފައިވާ އިންޑިއާގެ ކުޅަދާނަ ޑައިރެކްޓަރު ލޭކް ޓަންޑަން މަރުވެއްޖެ އެވެ.

މީޑިއާތަކުން ރިޕޯޓްކޮށްފައިވާ ގޮތުގައި 88 އަހަރުގެ އެކްޓަރު މަރުވީ އާދީއްތަ ދުވަހު ޕޮވާއީގައި ހުންނަ އޭނާގެ ގޭގަ އެވެ. ރިޕޯޓްތައް ބުނާ ގޮތުން ލޭކް މަރުވީ ފާއިތުވި ހައެއްކަ މަސް ދުވަހުގެ ތެރޭގައި އެނދުމަތިކޮށް ފަރުވާ ދެމުން ދަނިކޮށެވެ. އަދި އޭނާ އަށް ކާން ވެސް ދެމުން ގެންދިޔައީ ހޮޅި ގުޅައިގެންނެވެ.

"ރަންގް ދެ ބަސަންތީ" އާއި "ޗެންނައި އެކްސްޕްރެސް" ފަދަ ފިލްމްތަކުގައި އެކްޓް ވެސް ކޮށްފައިވާ ލޭކް ވަނީ އޭނާގެ އެންމެ ރަން ޒަމާނުގައި މަޝްހޫރު ވަރަށް ގިނަ ތަރިންނާ އެކު މަސައްކަތްކޮށްފަ އެވެ. އޭގެ ތެރޭގައި ޝައްމީ ކަޕޫރް، ޝަޝީ ކަޕޫރް، ރާޖެންދަރް ކުމާރް، ހެމާ މާލިނީ، ޝަބާނާ އަޒްމީ އަދި ރޭކާ ފަދަ ތަރިން ހިމެނެ އެވެ.

ލޭކް 1966 ގައި ގެނެސް ދިން ފިލްމް "އަމަރްޕާލީ" އަކީ އެ އަހަރު، އިންޑިއާ އިން އޮސްކާގެ ބެސްޓް ފޮރިން ލެންގްއޭޖް ފިލްމަށް ހުށަހެޅި ފިލްމް ވެސް މެ އެވެ.

އޭނާ ޑައިރެކްޓްކޮށްފައިވާ އިތުރު ފިލްމްތަކުގެ ތެރޭގައި ޕްރޮފެސާ (1962)، ޖުކް ގަޔާ އާސްމާ (1968) އަދި އަގަރް ތުމް ނަ ހޯތޭ (1983) ހިމެނެ އެވެ.

ލޭކްގެ ޖަނާޒާ މިއަދު މެންދުރު އޮންނާނެ އެވެ.