ބޮލީވުޑްގެ ޒުވާން އެކްޓަރުންގެ ތެރެއިން ވަރުން ދަވަންއަކީ ވަކިން ހާއްސަކޮށް ފާހަގަކޮށްލެވޭނެ އެކްޓަރެކެވެ. އޭނާ މިހާތަނަށް ކުޅުނު އެއްވެސް ފިލްމެއް ފްލޮޕްވެފައި ނުވާ އިރު، ވަރުންއަކީ މިހާރު އެންމެ ޑިމާންޑް ބޮޑު، ޒުވާން އެކްޓަރު ވެސް މެ އެވެ.
އޭނާގެ ވަރަށް ޝައުގުވެރި ފިލްމްތަކެއް ކުރިއަށް ވެސް އެބަ ހުއްޓެވެ. އޭގެ ތެރޭގައި "ސުއީ ދާގާ: މޭޑް އިން އިންޑިއާ"، "އޮކްޓޯބާ" އަދި "ޝިއްދަތު" ފަދަ ފިލްމްތައް ފާހަގަކޮށްލެވެ އެވެ.
މިހާރު މިއޮތީ ވެސް ޒުވާން އެހެން އެކްޓަރަކަށް ނުލިބޭ ޝަރަފެއް ވަރުން އަށް ލިބިފަ އެވެ. އެއީ މެޑަމް ޓްސޯޑްސްގެ ހޮންކޮންގް ގޮފިން އޭނާގެ ވެކްސް ސްޓެޗޫއެއް ހަދަން ނިންމުމެވެ.
Bollywood superstar @Varun_dvn is having his world-first figure in @TussaudsHK. He will unveil his figure in Hong Kong in early 2018 too! pic.twitter.com/yCMPd4QEYk
— Madame Tussauds HK (@TussaudsHK) October 16, 2017
އަންނަ އަހަރުގެ ކުރީކޮޅު ދައްކާލަން ނިންމާފައިވާ މި ސްޓެޗޫ ހެދުމަށްޓަކައި ވަރުންގެ ވަރުގަދަ އަދި ކަސްރަތީ ހަށިގަނޑުގެ މިންތައް ވެސް މިހާރު ވަނީ ނަގައިފަ އެވެ.
މެޑަމް ޓްސޯޑްސްގެ ޓީމުން ކުރި މަސައްކަތުގެ ތެރެއިން ނަގާފައިވާ ބައެއް ފޮޓޯތައް 30 އަހަރުގެ އެކްޓަރު ވަނީ ޓްވިޓާގައި ހިއްސާކޮށްފަ އެވެ.
#madametussauds coming soon pic.twitter.com/pAR9SWGC8T
— Varun Dhawan (@Varun_dvn) October 16, 2017
މި ލިބުނު ފުރުސަތާ ބެހޭ ގޮތުން ވަރުން ބުނީ މިހާ އަވަހަށް އޭނާގެ ވެކްސް ސްޓެޗޫއަކާ ހަމައަށް ދެވުމަކީ ވެސް ކުޑަ ކަމެއް ނޫނެވެ. އަދި އެކަމާ ވަރަށް އުފަލުން ހުރި ކަމަށް 2012 ގައި "ސްޓޫޑަންޓް އޮފް ދި އިޔާ" އިން ބޮލީވުޑަށް ނިކުތް އަދި މަޝްހޫރު ޑައިރެކްޓަރު ޑޭވިޑް ދަވަންގެ ދަރިފުޅު ބުންޏެވެ.
ބައްޕަ ޑައިރެކްޓް ކުރި ވަރުންގެ އެންމެ ފަހުގެ ފިލްމް "ޖުޅްވާ 2" އަކީ ވެސް ބޮޑު ހިޓެކެވެ. އެ ފިލްމަށް ލިބުނު އާމްދަނީ މިހާރު ވަނީ 200 ކްރޯޑް ރުޕީސް ފަހަނައަޅައި ގޮސްފަ އެވެ.