ރޯޒް އެވެ. އަހަރެންގެ މައްސަލައަކީ ވަރަށް އާދަޔާ ޙިލާފު މައްސަލައެކެވެ. ބުނަންވެސް ލަދު ގަނެ އެވެ. އެކަމަކު ނުބުނެ ކެތްވާކަށް ވެސް ނެތެވެ.
އަހަރެންގެ މަންމަ އާއި އަހަރެން އުޅެނީ ދޮން ބައްޕަގެ ހިޔާވަހިކަމުގެ ދަށުގަ އެވެ. އަހަރެންގެ އަސްލު ބައްޕަޔަކީ އިންތިހާޔަށް ރުޅި ގަދަ މަސްތުވާތަކެތި ބޭނުން ކުރާ މީހެކެވެ. މީގެ ސަބަބަކަށްވީ މަންމަ ބައްޕަ ކާރިން ވަރިވުމެވެ.
އޭރު އަހަރެންގެ އުމުރުން 5 އަހަރެވެ. ކިތަންމެ އުމުރު ހަނގު ވިޔަސް ބައްޕަގެ އުޅުމާއި ކަންތައްތަށް އަހަރެން ހަދާން ހުރެ އެވެ. އަހަރެންގެ މަންމަ ޔަށް ކިރިޔާ ހިތްހަމަޖެހޭ ދިރިއުޅުމެއް ލިބުނީ ދޮން ބައްޕަޔާ އިން ފަހުންނެވެ.
މަންމަ މިހާރު ރޯތަނެއް އަހަރެން ނުދެކެމެވެ. އެހެނަސް ކޮންމެ ރެޔަކު އަހަރެން ރޯން ޖެހެ އެވެ. ކޮންމެ ހެނދުނަކު ހިނިތުންވުމާ އެކު އެނިކަމެތި މަންމަޔާ ބައްދަލު ކުރަން ޖެހެ އެވެ. މިހާލެއްގައި އަހަރެން އުޅޭތާ މިހާރު 10 އަހަރު ވެއްޖެ އެވެ. ރޯޒް އެވެ. އަހަރެންގެ ދޮން ބައްޕަ ކޮންމެ ރެޔަކު ޝައިތާނެއް ހެން އަހަރެންގެ އިއްޒަތް ލޫޓްވާލަ އެވެ.
ކުޑަ އިރު އަހަރެންނަށް ވަނީ ތަދުކަމެއް މިހާރަކު އަހަރެން ހަނދާނެއް ނުހުރެ އެވެ. އެހެނަސް ގައިމުވެސް މިކަމަކީ އަހަރެން ކުރިޔަށް ގެންދަން ބޭނުންވާ ކަމެއް ނޫނެވެ. ދޮން ބައްޕަގެ އަމަލު ތަކުން އަހަރެން މާޔޫސް ވެ އެވެ. ދުނިޔެމަތިން ފޫހިވެ އެވެ.
އެހެނަސް މަންމަގެ އުފާތަކަށް ބުރު އަރާފާނެތީ ބުނާކަށް ނުކެރެ އެވެ. މަންމަ ބުނާނީ އަހަރެންގެ އުފަން ބައްޕަ މަންމަގެ ދިރިއުޅުން ހަލާކު ކުރިހެން އަހަރެން ވެސް މަންމަ ގެ ދިރިއުޅުން ހަލާކު ކުރީ ކަމަށެވެ. މިކަމަށް ބިރުން މަންމަ ކައިރީ މި ވާހަކަ ބުނާކަށް ނުކެރެ އެވެ.
އަނެއްކޮޅުން ދޮން ބައްޕަ ވަނީ އަހަރެން މި ވާހަކަ ދައްކައިފި ނަމަ މަންމަ ވަރި ކުރާނެ ކަމުގެ އިންޒާރު އަހަރެންނަށް ދީފަ އެވެ. ވީ އިރު މަންމަ ކާރީ މި ވާހަކަ ބުނާނީ ފަހެ ކިހިނެއް ހެއްޔެވެ؟ އަނެއްކޮޅުން އަހަރެންގެ އުފަން ބައްޕަ ދެކެ މަންމަ އަންނަ ރުޅީގެ ބަދަލުގައި ވެސް މަންމަ އަހަރެންނަށް ނަފްރަތު ކުރެ އެވެ.
ދޮން ބައްޕަ އަށް ވެސް މިކަން އެނގެ އެވެ. އަދި އަހަރެން ދައްކާ އާދައިގެ ވާހަކަ ތަކަކީ ވެސް މަންމަގެ ކުރިމަތީ މާކަ ވިކޭ ވާހަކަތަކެއް ނޫނެވެ.
ރޯޒް އެވެ. އަހަރެން ކަރުނަ އަޅާ ނުރޯ ދުވަހެއް ނާދެ އެވެ. އަހަރެންގެ ހަޔާތް މި ވަނީ ލައްތަކުން ފުރިފަ އެވެ. އަހަރެން މި ވާހަކަ މީޑިޔާ މެދުވެރިކޮށް މި ވާހަކަ ކިޔާ މިދިނީ ރޯޒް ގެ ފަރާތުން އަހަރެން ކަހަލަ ނިކަމެތި ކުދިންނަށް އެހީއަކަށް އެދި އެވެ. އައްޑު އަތޮޅުގައި އަހަރެން ފަދަ ބައިވަރު ކުދިން އެބަތިއްބެވެ. ރޯޒީގެ އެހީ ބޭނުން ވެފަ އެވެ.
ޝާމާގެ ފަރާތުން ރޯޒީ އަށް
ޖަވާބު: ޝާމާ އެވެ. ޝާމާގެ ހަޔާތުގެ ވާހަކަ ކިޔާފަ ވަރަށް ދެރަވެއްޖެ އެވެ. އަސްލު ބުނެވޭނީ ތިޔައީ ވަރަށް ހިތްވަރު ގަދަ އަޒުމު ވަރުގަދަ އަންހެން ކުއްޖެކޭ އެވެ. މަންމައަށްޓަކައި ތިޔަވެފައި ވަނީ ވަރަށް ބޮޑު ޤުރުބާނީއެކެވެ.
އެހެނަސް ޝާމާ އެވެ. ޝާމާ ވެސް ދިރިހުރުން މަޖްބޫރެވެ. ތިޔަހެން މަރުވެ މަރުވެފައި ދިރި ހުރުމަށް ވުރެ ހިތްވަރުކޮށްފައި ތިޔަކަންތަކުން ސަލާމަތްވުން ބުއްދިވެރި އެވެ.
ޝާމާ އާއިލާގެ ކޮންމެވެސް އިތުބާރު ހިފޭ ބޮޑު މީހެއްކާރީ ތިވާހަކަ ދައްކާށެވެ. އަދި ތިޔަ މާހައުލާ ދުރަށް ދާށެވެ. ހިތްވަރާ އެކު ތައުބާ ވާށެވެ. އަދި ﷲ އެންގެވި ގޮތަށް ދިރިއުޅެން ފަށާށެވެ. ރޯޒީގެ ދުޢާއަކީ ޝާމާއަށް ރަނގަޅު މުސްތަޤުބަލެއް ﷲ މިންވަރު ކުރެއްވުމެވެ.
(ނިމުނީ)