ބާރަ ވަނަ ސިލްކް ރޯޑް މޭޔާސް ފޯރަމުގައި ބައިވެރިވެވަޑައިގަތުމަށް އައްޑޫ މޭޔަރު އަބްދުﷲ ސޯދިގް (ސޯބެ) އަފްގާނިސްތާނަށް ފުރައިވަޑައިގެންފި އެވެ.
މި ފޯރަމަކީ މެމްބަރުންގެ މެދުގައި އޮންނަ ވިޔަފާރި އާއި ސަޤާފީ އަދި ފަރުދީ ގުޅުން ވަރަގަދަކޮށް ދެމެހެއްޓެނެވި ގޮތެއްގައި މުޢާމަލާތް ކުރެވޭނެ ގޮތްތަކާއި ބެހޭ ގޮތުން މަޝްވަރާކުރުމަށް ބާއްވާ ފޯރަމެކެވެ. މި މަޝްވަރާތަކުގެ ސަބަބުން މެމްބަރު ސިޓީތަކާއި ޤައުމުތަކުގެ ޓޫރިޒަމް އަދި ވިޔަފާރީގެ މުޢާމަލާތް ފުޅާކުރުމަށް އިތުރު ދޮރުތަކެއް ހުޅުވިގެންދާނެ އެވެ.
ދެހާސް ހަ ވަނަ އަހަރުންފެށިގެން ކޮންމެ އަހަރަކު ބާއްވަމުން އަންނަ ސިލްކް ރޯޑް މޭޔާސް ފޯރަމް މި ފަހަރު ކުރިއަށް ދާނީ މި މަހުގެ 20 ވަނަ ދުވަހު އަފްޤާނިސްތާނުގެ ވެރިރަށް ކާބުލްގަ އެވެ.
މި ފޯރަމަކީ ވޯލްޑް ސިޓިޒެންސް އޯގަނައިޒޭޝަނުން އިންތިޒާމުކޮށްގެން ބާއްވާ ފޯރަމެކެވެ.
ވޯލްޑް ސިޓިޒެންސް އޯގަނައިޒޭޝަނަކީ 1987 ވަނައަހަރު އުފެދުނު ޖަމުޢިއްޔާއެކެވެ. މި ޖަމިއްޔާއަކީ ޤައުމުތަކުގެ މެދުގައިވާ އެކި ކަހަލަ ގުޅުންތައް ވަރުގަދަކޮށް އެކުވެރިކަން އާލާކުރުމުގެ މަޤްސަދުގައި އުފެދިގެން އައި ޖަމިއްޔާއެކެވެ. ޖަމުޢިއްޔާގެ ޝިޢާރަކީ ކޮންމެ އިންސާނެއް ވެސް އަދި ދުނިޔޭގެ ކޮންމެ ތަނެއް ވެސް ތަފާތު ކަމެށެވެ.