މަރަދޫ ބަނދަރު ބޮޑު ކުރުމަށް ހިންގާ މަޝްރޫއުގެ ދަށުން އެ ބަނދަރުގެ އެންވަރަޔަމަންޓް އިމްޕެކްޓް އެސެސްމަންޓް (އީއައިއޭ) އާއި ކޮންސަލްޓެންސީ ދޭނެ ބަޔަކު ހޯދަން ހައުސިން މިނިސްޓްރީން އިއުލާންކޮށްފި އެވެ.
އެ މިނިސްޓްރީން ބުނީ މިކަމާ ބެހޭ މައުލޫމާތު ކަރުދާސް މިނިސްޓްރީގެ ވެބްސައިޓުން މިހާރު ޑައުންލޯޑް ކުރެވޭނެ ކަމަށާއި ޝައުގުވެރިވާ ފަރާތްތަކަަށް ޓެކްނިކަލް ޕްރޮޕޯސަލް ހުށަހެޅުމުގެ ފުރުސަތު މި މަހުގެ 26 ވަނަ ދުވަހާ ހަމައަށް ހުޅުވާލާފައިވާ ކަމަށެވެ.
މިކަމާ ބެހޭ ގޮތުން މައުލޫމާތު ދިނުން ބުރާސްފަތި ދުވަހު ހެނދުނު 11:00 ގައި މިނިސްޓްރީގައި އޮންނާނެ އެވެ.
އައްޑޫގައި އެންމެ ގިނަ މަސްއޮޑި އޮންނަ މަރަދޫ ބަނދަރު ވަރަށް ބޮޑަށް ހަލާކުވުމުގެ އިތުރުން، އެތަނަށް ޖާގައިގެ ދަތިކަން ކުރިމަތިވެގެން ބަނދަރު އެންމެ ފަހުން ހަދާފައި ވަނީ 2007 ވަނަ އަހަރު އެވެ. އެއީ ޑެންމާކްގެ ހޯގާޑާ ހަވާލުކޮށްގެންނެވެ.
އައްޑޫގެ އަވަށްތަކުގެ ބަނދަރުތަކުގެ ތެރެއިން މިހާރު އެންމެ ދަތިކޮށް އޮތީ މަރަދޫފޭދު އާއި މީދޫ ބަނދަރެވެ. ހައުސިން މިނިސްޓަރު ޑރ. މުހައްމަ މުއިއްޒު މިދިޔަ މަހު އައްޑު އަށް ކުރެއްވި ދަތުރުގައި އަވަށްތަކުގެ ބަނދަރުތަކުގެ ހާލަތު ބައްލަވާފައިވެ އެވެ.