ގާނޫނުގެ މަތީގައި އެއްވެސް މީހަކަށް ނުހުރެވޭނެކަން ދިވެހި އެންމެހާ ރައްޔިތުންނަށް ޔަގީންކޮށް ދިނުމަކީ ފުލުހުންގެ އެންމެ ބޮޑު އެއް މަސްއޫލިއްޔަތުކަމަށް ކޮމިޝަނާ އޮފް ޕޮލިސް އަބްދުﷲ ރިޔާޒު ވިދާޅުވެއްޖެ އެވެ.
ސީޕީ ރިޔާޒު ދެެއްވި ވީޑިއޯ އިންޓަވިއުއެއްގައި ވިދާޅުވީ ގާނޫނުގެ ނުވަތަ ޝަރީއަތަށް ވުރެ މަތީގައި އެއްވެސް މީހަކަށް ނުހުރެވޭނެ ކަމަށެވެ. އަދި އެންމެންނާ މެދު ވެސް އަމަލު ކުރަނީ ހަމަހަމަކަމާ އެކީގައިކަން ދިވެހި އެންމެހާ ރައްޔިތުންނަށް ޔަގީންކޮށް ދިނުމަކީ ފުލުހުންގެ މަސްއޫލިއްޔަތެއް ކަމަށް އޭނާ ވިދާޅުވި އެވެ.
ރާއްޖޭގެ އަމަންއަމާން ކަމާއި ސުލްހަ މަސަލަސްކަން ދެމެހެއްޓުމަކީ ވެސް ފުލުހުންގެ މަސްއޫލިއްޔަތެއް ކަމަށާއި އެހެންކަމުން ރާއްޖޭގައި ދިރިއުޅޭ އެންމެހާ ރައްޔިތުންނަށް ރާއްޖޭގައި އަމާންވެއްޓެއް އޮތްކަން ޔަގީން ކޮށްދެއްވާނެ ކަމަށް ރިޔާޒު ވިދާޅުވި އެވެ.
ސީޕީ ވިދާޅުވީ ރާއްޖޭގައި އިންވެސްޓް ކުރާ ފަރާތްތަކަށް ވެސް މިއީ އަމާން މުޖުތަމައެއްކަން ފުލުހުން ދައްކައި ދޭނެ ކަމަށެވެ. އަދި ނިމި ދިޔަ އަހަރު ވެސް ފުލުހުންގެ މަސްއޫލިއްޔަތު އަދާކުރެއްވުމުގައި ބޮޑެތި ކާމިޔާބީތަކެއް ހޯއްދެވިކަން ފާހަގަ ކުރެއްވި އެވެ. ރިޔާޒު ވިދާޅުވީ މިދިޔަ އަހަރު ބޮޑެތި ކުށްތައް ކުރުން މަދުކުރެވިފައިވާ ކަމަށެވެ.