ތޯރިގްގެ ރައްދެއް ސޯބެ އަށް

ފެނަކައިން އައްޑު އަށް ދޭ ފެނުގެ ހިދުމަތް އައްޑޫ ރައްޔިތުން ނުހޯދަން އެދިވަޑައިގެން، އައްޑޫ މޭޔަރު އަބްދުﷲ ސޯދިގް (ސޯބެ) ދެއްކެވި ވާހަކަތަކަށް އެންވަޔަރަމަންޓް މިނިސްޓަރު ތޯރިގް އިބްރާހީމް ރައްދު ދެއްވައިފި އެވެ.

މިނިސްޓަރު ވިދާޅުވީ ސަރުކާރުން ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދީ ތަރައްގީގެ މަޝްރޫއުތައް ހިންގަމުން އަންނަަ އިރު ބައެއް ފަރާތްތަކުން އެކަންކަން ސިޔާސީ ކުރަން އުޅޭ ކަމަށެވެ.

އަދި މޭޔަރު ދެއްކެވީ ވަރަށް ޒިންމާދާރުކަން ކުޑަ ވާހަކަތަކެއް ކަމަށް ތޯރިގް ވިދާޅުވި އެވެ.

"ރަށްރަށުގައި ޤާއިމުކޮށްފައިވާ ކައުންސިލްތަކަކީ ރައްޔިތުންނަށް ބޭނުންވާ ތަރައްޤީ އެ ރަށަކާއި ހަމައަށް ގެނެސް ދިނުމަށް، ސަރުކާރަށް އެއްބާރުލުންދީ، ރައްޔިތުންނާއި ސަރުކަރާ ދެމެދު މެދުވެރިއެއްގެ ދައުރު އަދާކުރާ ފަރާތް. [އެކަމަކު] ބައެއް ކައުންސިލްތަކުން ވަކި ސިޔާސީ ފިކުރެއް ޕްރޮމޯޓްކުރަން މަސައްކަތް ކުރުމަކީ ތަރައްޤީގެ މަޝްރޫޢުތައް ކުރިއަށްގެން ދިއުމުގައި ސަރުކާރަށް ދިމާވާ ވަރަށް ބޮޑު ގޮންޖެހުމެއް."

މިނިސްޓަރު ވިދާޅުވީ އަސާސީ ޙިދުމަތްތަކަކީ މުޅި މުޖުތަމަޢުގެ މަސްލަހަތު ހިމެނޭ ކަންކަމަށްވާ އިރު، ބައެއް ކައުންސިލްތަކުން، އެ ރަށްރަށުގައި ހިންގޭ މަޝްރޫޢުތަކާއި ގުޅޭ ގޮތުން ރައްޔިތުންނަށް ދޮގު މަޢުލޫމާތު ދޭ ކަމަށެވެ.

"ސަރުކާރުން ރައްޔިތުންނަށް ބޭނުންވާ އަސާސީ ޙިދުމަތްތައް ފޯރުކޮށް ދިނުމުގައި އެއްވެސް ތަފާތު ކުރުމެއް ނުގެންގުޅޭނެ. އަދި ތަރައްޤީގެ މަޝްރޫޢުތައް ސަރުކާރުން ކުރިއަށް ގެންދަވަނީ ވަކި ކުލައަކަށް ބެލުމެއް ނެތި. އެއީ ހުރިހާ ރައްޔިތުންގެ ވެސް ހެވާއި ލާބައަށް ސަރުކާރުން ކުރިއަށްގެންދާ މަޝްރޫޢުތަކެއް." ތޯރިގް ވިދާޅުވި އެވެ.

ފެނަކަގެ ފެނުގެ ހިދުމަތާ ބެހޭ ގޮތުން ސޯބެ ވިދާޅުވީ ފެނުގެ ހިދުމަތް އައްޑޫގައި ދެނީ އެހެން ހިސާބުތަކަށް ވުރެ ތިންގުނަ އަގުބޮޑުކޮށް ކަމަށާއި އެ ފެނަކީ ބޯން ވެސް ރައްކާތެރި ފެނެއް ނޫން ކަމަށެވެ.