ބޮލީވުޑްގެ މަޝްހޫރު ބަތަލާ ރާނީ މުކަރްޖީގެ ބައްޕަ ރާމް މުކަރްޖީ މިއަދު މަރުވެއްޖެ އެވެ.
މީޑިއާތަކުން ރިޕޯޓްކޮށްފައިވާ ގޮތުގައި ރާމް، 84، މަރުވީ ބަލިވެގެން މުމްބާއީގެ ބްރީޗް ކެންޑީ ހޮސްޕިޓަލްގައި ފަރުވާ ދެމުން ދަނިކޮށެވެ. އޭނާ އެޑްމިޓް ކުރީ ލޭގެ ޕްރެޝަރު މަތިވެގެން ކަމަށާއި ފަރުވާ ދެމުން ދަނިކޮށް މަރުވީ މިއަދު ފަތިހުގެ ވަގުތެއްގައި ކަމަށް މީޑިއާތަކުން ބުންޏެވެ.
ރާމް ވަނީ ޑައިރެކްޓަރެއްގެ އިތުރުން ސްކްރީން ރައިޓަރެއްގެ ގޮތުގައި ވެސް މަސައްކަތްކޮށްފަ އެވެ. އޭނާ ހަދާފައިވާ ފިލްމްތަކުގެ ތެރޭގައި ހަމް ހިންދުސްތާނީ (1960)، ލީޑާ (1964) އަދި އޭކް ބާރް މުސްކްރާ ދޯ (1972) ފަދަ ފިލްމްތައް ހިމެެނެ އެވެ.
"ކުޗް ކުޗް ހޯތާ ހޭ" ފަދަ ފިލްމްތަކުން ވިދާލި ރާނީ ފިލްމީ ދާއިރާ އަށް ވެސް ނެރުނީ ބައްޕަ ރާމް އެވެ. އެއީ 1996 ގައި ރިލީޒް ކުރި ބެންގާލީ ފިލްމް "ބިޔެރް ޕޫލް" އިންނެވެ.
އެ ފިލްމް 1997 ގައި ވަނީ "ރާޖާ ކީ އާއޭގީ ބާރާތު" ގެ ނަމުގައި ރާނީއާ އެކު ހިންދީ ފިލްމެއްގެ ގޮތުގައި ވެސް ރާމް ޕްރޮޑިއުސްކޮށް ނެރެފަ އެވެ.