ބޮލީވުޑްގެ ކުރީގެ ބަތަލާ އަދި ހެމާ މާލިނީ އާއި ދަރްމެންދްރާގެ ދޮށީ އަންހެން ދަރިފުޅު އީޝާ ޑިއޯލް އަންހެން ކުއްޖަކު ވިހައިފި އެވެ.
ރިޕޯޓްތައް ބުނާ ގޮތުން އީޝާ، 36، ވިހެއީ ހުކުރު ދުވަހު އެވެ. އަދި ދަރިފުޅާއި އީޝާގެ ހާލު ވެސް ރަނގަޅެވެ. ދަރިފުޅަށް ދީފައިވާ ނަމަކީ ރާދިއާ އެވެ.
ބޮލީވުޑުން މާ ބޮޑު ކުރިއެރުމެއް ނުލިބެ، ކުޅޭނެ ފިލްމެއް ވެސް ނުލިބޭތީ އީޝާ އެކްޓް ކުރުން ހުއްޓާލައި ލޯބިވެރިޔާ 2012 ވަނަ އަހަރު ކައިވެނި ކުރީ ބާރަތު ތަޙްތާނީ ކިޔާ ވިޔަފާވެރިއަކާ އެވެ.
ކޮއި މެރެ ދިލް ސެ ޕޫޗޭ (2002) އިން ބޮލީވުޑަށް ނިކުތް އީޝާގެ ފިލްމީ ކެރިއަރަށް ބަލާ އިރު، އޭނާގެ މާ ފާހަގަކޮށްލެވޭ ފިލްމުތަކެއް ނެތެވެ. ހަމައެކަނި ފާހަގަކޮށްލެވޭ އެއް ފިލްމަކީ "ދޫމް" އެވެ.
އޭނާ އެންމެ ފަހުން ކުޅުނު ފިލްމަކީ މަންމަ ހެމާ 2011 ގައި ޑައިރެކްޓް ކުރި "ޓެލް މީ އޯ ޙުދާ" އެވެ.
ފިލްމް ކުޅުން ހުއްޓާލި ފަހުން، އީޝާ އެންމެ ފަހުން ފެނުނީ 2015 ގައި އެމްޓީވީން ގެނެސް ދިން ރިއަލިޓީ ޝޯ "ރޯޑީޒް" އިންނެވެ.
އީޝާގެ ކޮއްކޮ އަހާނާ ޑިއޯލް ވެސް ކައިވެނިކޮށްގެން ވަނީ ދަރިއަކު ލިބިފަ އެވެ.