އަންނަ އަހަރުގެ ރިޔާސީ އިންތިހާބަށް ރައީސް އަބްދުﷲ ޔާމީނަށް ކެމްޕޭންކޮށް ދެއްވުމަށް ފަސްޓްލޭޑީ މެޑަމް ފާތުމަތު އިބްރާހީމް އައްޑު އަށް ކުރެއްވި ދަތުރުފުޅު ނިންމަވައިލެއްވުމަށް ފަހު މިއަދު ފުރާވަޑައިގެންފި އެވެ.
"އެންމެ ގާތުން" ގެ ނަމުގައި މެޑަމް ކުރައްވާ ދަތުރުތަކުގެ ތެރެއިން އައްޑު އަށް ވަޑައިގެންނެވީ މިދިޔަ ބުރާސްފަތި ދުވަހުގެ ރެ އެވެ.
މެޑަމްގެ ދަތުރުގެ ތެރޭގައި އައްޑޫގައި ވަނީ "އަފިރިންނަސް ތައްޔާރަ" ގެ ނަމުގައި ޖަލްސާއެއް ވެސް ބާއްވާފަ އެވެ. އެ ޖަލްސާގައި ބައެއް ވަޒީރުންނާއި މަޖިލިސް މެމްބަރުންނާއި ސަރުކާރުގެ ކުންފުނިތަކުގެ އިސްވެރިން ބައިވެރިވަޑައިގެންނެވި އެވެ.
ޕީޕީއެމުން ބުނާ ގޮތުގައި އެ ޖަލްސާ އަށް ރެކޯށް އަދަދަކަށް މީހުން ދިޔަ އެވެ.
މީގެ އިތުރުން ހޮނިހިރު ދުވަހު އައްޑޫ ފުޓްބޯޅަ ސްޓޭޑިއަމްގައި 19 އަހަރުން ދަށުގެ ގައުމީ ފުޓްބޯޅަ ޓީމާއި އައްޑޫން ހޮވާލެވުނު ޓީމްގެ މެޗް ވެސް މެޑަމް ޝަރަފުވެރިކޮށް ދެއްވި އެވެ.
މެޑަމް ވަނީ އައްޑޫގެ ހުރިހާ އަވަށްތަކަށް ވެސް ވަކިވަކިން ވަޑައިގެން އެ އަވަށްތަކުގެ އިސްރަށްވެހިންނާއި ޒުވާނުންނާއި އަންހެނުންނާއި ހާއްސަ އެހީއަށް ބޭނުންވާ މީހުންނާއި ޕީޕީއެމްގެ ސަޕޯޓަރުންނާ ވެސް ބައްދަލުކުރައްވާފަ އެވެ.