ނުރައްކާތެރި ހެޕަޓައިޓިސް އޭ ޖަރާސީމު އެކުލެވޭ މިކްސްޑް ބެރީތަކެއް ރާއްޖެއަށް އެތެރެކޮށްފައިވާތީ އެތަކެތި ވިއްކުން މަނާކޮށް އާންމުން ސަމާލުވުމަށް ފުޑް އެންޑް ޑްރަގް އޮތޯރިޓީން އަންގައިފިއެވެ.
އެމްއެފްޑީއޭން ނެރުނު ނޫސް ބަޔާނެއްގައި ބުނެފައިވަނީ މިވައްތަރުގެ މިކްސްޑް ބެރީސްއަކީ ނިއުޒިލެންޑުގެ ފުޑް އެންޑް ޑްރަގް އޮތޯރިޓީންވެސް މަނާކޮށްފައިވާ ބާވަތެއް ކަމަށެވެ.
ފިހާރަތަކުން މި ވައްތަރުގެ ބެރީސް ނެގުމުގެ މަސައްކަތް މިހާރު އެއިދާރާއިން ކުރަމުންދާއިރު އާންމުންވެސް މިބާވަތްތައް ގަނެ، ބޭނުންކުރާއިރު ސަމާލުވުމަށް އެމްއެފްޑީއޭއިން ވަނީ އިލްތިމާސްކޮށްފައެވެ.
އެމްއެފްޑީއޭއިން ވިއްކުން މަނާކޮށްފައިވަނީ ކްރިއޭޓިވް ގޯމޭ މަރުކާގެ ގަނޑުކުރި މިކްސްޑް ބެެރީސްގެ 300 ގްރާމްގެ ޕެކެޓެވެ. މީގެ މުއްދަތު ހަމަވާނީ 2021 ވަނަ އަހަރު ޖެނުއަރީ 15 އަށެވެ.
އެމްއެފްޑީއޭއިން ވަނީ މިބާވަތް އެއްވެސް ފިހާރައަކުން ވިއްކަން ހުރިތަން ފެނިއްޖެނަމަ އެއިދާރާއަށް ވަގުތުން އެންގުމަށް އެދިފައެވެ.