މިދިޔަ ބުރާސްފަތި ދުވަހުން ފެށިގެން މިއަދަށް އައްޑު އަށް ކުރެއްވި ދަތުރުފުޅުން އެނގިގެން ދިޔައީ ސަރުކާރުން އެ ސިޓީ އަށް ގެންނަ ތަރައްގީ ރައްޔިތުން ބަލައިގަންނަމުންދާ މިންވަރު ކަމަށް ފަސްޓްލޭޑި މެޑެމް ފާތުމަތު އިބްރާހީމްދީދީ ވިދާޅުވެއްޖެ އެވެ.
ޕީއެސްއެމަށް ދެއްވި އިންޓަވިއުއެއްގައި މެޑަމް ވިދާޅުވީ ރައީސް އަބްދުﷲ ޔާމީން ގެންނަވާ ތަރައްގީގެ މަޝްރޫއުތަކާ މެދު އައްޑޫ ރައްޔިތުން ތިބީ ހިތްހަމަޖެހިފައި ކަމަށެވެ.
"އައްޑޫ ސިޓީން އަޅުގަނޑަށް މަރުހަބާ ކީމަ ވަރަށް ވަރަށް ބޮޑަށް ޝުކުރު ދަންނަވަން. އަދި އެކަމުން އަޅުގަނޑަށް ގަބޫލުކުރެވުނު އެއްޗަކީ ރައީސް ޔާމީންގެ ތަރައްގީގެ މަޝްރޫއުތައް،" އެކަމަނާ ވިދާޅުވި އެވެ. "ޚާއްސަކޮށް މި އައްޑޫ ސިޓީން އެ މަޝްރޫއުތައް ބަލައިގަތްކަން. އަދި އެކަމާ ދޭތެރޭ އެ މީހުން ހިތްހަމަޖެހޭކަން،"
މެޑަމް ވިދާޅުވި އެ ކަމާނެގެ ދަތުރުފުޅަކީ އެންމެ ގާތުން އައްޑޫ ސިޓީގެ ރައްޔިތުންގެ ހާލު ބަލާލުމަށް ކުރެއްވި ދަތުރުފުޅެއް ކަމަށާއި އަބަދުވެސް އެދެނީ ރައްޔިތުންނާ ގާތުން ޚިދުމަތްކުރަން ފުރުސަތު ދިނުން ކަމަށް މެޑަމް ފާތުން ވިދާޅުވިއެވެ.
"އަޅުގަނޑު އެދެނީ ރައްޔިތުންނާ ގާތުން ޚިދުމަތްކުރަން ފުރުސަތުތަކެއް ދިނުން،" މެޑަމް ވިދާޅުވިއެވެ.
އެ ދަތުރުފުޅުގައި މެޑަމް ވަނީ އައްޑޫގެ އަވަށްތަކަށް ވަކިވަކުން ވަޑައިގެން ޚާއްސަ އެހީއަށް ބޭނުންވާ ކުދިންނާއި ޒުވާނުންނާއި އިސްރަށްވެހިންނާއި ޕީޕީއެމްގެ ސަޕޯޓަރުންނާ ބައްދަލުކޮށް އެ މީހުންގެ ބޭނުންތައް އޮޅުންފިލުއްވައިފަ އެވެ.