ފަސްޓްލޭޑި މެޑަމް ފާތުމަތު އިބްރާހީމް އައްޑު އަށް ވަޑައިގެން ބައްސަވާ ސިޓީ އުރައަކަށް ރައްޔިތުން ނުވިކޭނެ ކަމަށް ރައްޔިތުންގެ މަޖިލީހުގެ އައްޑޫ ސިޓީ މީދޫ ދާއިރާގެ މެންބަރު ރޮޒައިނާ އާދަމް (ރޮޒޭ) ވިދާޅުވެއްޖެ އެވެ.
އެމްޑީޕީ ހަރުގޭގައި ބޭއްވި ޖަލްސާގައި އޭނާ ވިދާޅުވީ އައްޑު އަށް މެޑަމް ފާތިމަތު އިބްރާހިމް ކުރެއްވި ދަތުރުފުޅަކީ، "އަލަވަލު ހާޖީގެ ހައްޖު ދަތުރު" ފަދަ ދަތުރެއް ކަމަށެވެ.
"އަލަވަލު ހާޖީ ވެސް ހައްޖަށް ދިއުމަށް ކަމަށް ބުނެ ފުރައިގެން ދެވުނީ ފުވައްމުލަކަށް. އަނބުރާ ރަށަށް ދިއުމުން އެތަނުން ފެނުނީ ކޮން އެއްޗެއްތޯ މީހުން އެހުމުން އެތަނަކީ ވަރަށް އަލަ ގަސް ގިނަ ތަނެއް ކަމަށް ބުނި،" ރޮޒޭ ވިދާޅުވި އެވެ. "މެޑަމް އަށް ވެސް ވީ ހަމަ އެވަރު. މެޑަމް އަށް ނަސީބަކުން އައްޑު އަށް ލައްވާލި. އެހެން ނަމަވެސް މެޑަމްގެ ހާލު އަލަވަލު ހާޖީ އަށް ވުރެ ބޮޑު. މެޑަމް އަށް އައްޑޫ ރައްޔިތުންގެ ހަގީގީ ހާލަތު އެއްގޮތަކަށް ވެސް ނޭނގުނު."
އޭނާ ވިދާޅުވި ގޮތުގައި އައްޑޫގައި ޖަލްސާތައް ބާއްވާފައި، މިނިސްޓަރުން އަރާ އައްޑޫ ރައްޔިތުން ބޭނުން ވަނީ ރައީސް އަބްދުﷲ ޔާމީން ފަދަ ވެރިއެއްކަމަށް ވިދާޅުވި ނަމަވެސް، އައްޑޫގެ ރައްޔިތުން ތިބީ މިއަދު ވަރަށް އުނދަގޫ ހާލަތެއްގައި ކަމަށެވެ.
ރޮޒޭ ވިދާޅުވީ ދުވާލަކު ހަ ފަހަރު ކަރަންޓް ކެނޑޭ އިރު ފެނުގެ ހިދުމަތުން ބޮޑު އަގެއް ނަގަމުންދާ ކަމަށެވެ. މި ހާލަތުގައި އޮތް އިރު ރައީސް ޔާމީން ފަދަ ވެރިއަކު އައްޑޫ ރައްޔިތުން ބޭނުންވާނެތޯ އޭނާ ސުވާލު ކުރެއްވި އެވެ.
"މެޑަމް ދާއިރަށް މަގުތަކުގައި ފަސްކޮޅެއް އަޅާ، ރައީސް ޔާމީން ކެމްޕެއިން އަންނަ އިރަށް މަގު ހެދޭނެއޭ ބުންޏަސް ރައީސް ނަޝީދުގެ ސަރުކާރުން ފެށިގެން އައްޑޫގެ މަގު ހެދުމަށް ބޭނުންވާ ހުރިހާ ސާމާނަކާ އެކު އެހެރީ މަސައްކަތް ހުއްޓިފައި،" ރޮޒޭ ވިދާޅުވި އެވެ. "ތަކެތި ހުރެމެ މަސައްކަތް ނުކުރެވިގެން އުޅެނީ. އަދިވެސް މިދެއްކެނީ ފައްޓާ ވާހަކަ."