ޕީޕީއެމުން އަންނަ އަހަރުގެ ރިޔާސީ އިންތިހާބަށް ކެމްޕޭން ކުރަމުން އަންނަ އިރު، ރައީސް އަބްދުﷲ ޔާމީން ރައްޔިތުންނާ ބައްދަލު ކުރައްވަން މިއަދު ރ. އަތޮޅަށް ފުރާވަޑައިގެންފި އެވެ.
ރައީސް އޮފީހުން ބުނީ މި ދަތުރުފުޅުގެ ފުރަތަމަ މަންޒިލެއްގެ ގޮތުން ރައީސް މަޑުއްވަރީ އަށް ވަޑައިގެން، އެ ރަށުގެ ނަރުދަމާގެ ޚިދުމަތް ފަށްޓަވައި ދެއްވުމާއި ގޮނޑުދޮށް ޙިމާޔާތް ކުރުމުގެ މަޝްރޫޢުގެ ނިންމުން ފާހަގަ ކުރެއްވުމަށް ހަމަޖެހިފައިވާ ކަމަށެވެ.
ދެވަނަ މަންޒިލެއްގެ ގޮތުން ރައީސް ފައިނަށް ވަޑައިގެން އެރަށު ބަނދަރު ހުޅުއްވައި ދެއްވާނެ އެވެ. އަދި މިއަދު ހަވީރު މީދު އަށް ވަޑައިގެން އެ ރަށުގައި ބިނާކޮށްފައިވާ އާ މިސްކިތް ހުޅުއްވައި ދެއްވުމަށް ފަހު، މީދޫގެ ފެނުގެ ޚިދުމަތާއި، ނަރުދަމާގެ ޚިދުމަތް ފެށްޓެވުމަށް ފަހު، އެރަށުގެ ރައްޔިތުންނާ ބައްދަލު ކުރައްވާނެ އެވެ.
ރައީސް ޔާމީން މިއަދު ރ. އަތޮޅަށް ފުރާވަޑައިގެންނެވި އިރު، އަނބިކަނބަލުން ފާތުމަތު އިބްރާހީމް އައްޑޫގައި ކެމްޕޭން ކުރެއްވުމަށް ފަހު މާލެ ވަޑައިގަތީ އިއްޔެ އެވެ.