އައްޑޫގައި ގޮނޑުދޮށް ހިމާޔަތް ކުރުމުގެ މަޝްރޫއެއް ފަށަން ނިންމައިފި އެވެ.
މިއީ އެންވަޔަރަންމަންޓް މިނިސްޓްރީ އާއި ޖަޕާން އިންޓަނޭޝަނަލް ކޯޕަރޭޝަން އޭޖެންސީ (ޖައިކާ) އިން ގުޅިގެން ހިންގާ މަޝްރޫއެކެވެ.
މިކަމާ ބެހޭ ގޮތުން މިނިސްޓްރީ އާއި ޖައިކާގެ ޓީމެއް އައްޑޫ ސިޓީ ކައުންސިލާ ބައްދަލުކޮށް މައުލޫމާތު ހިއްސާކޮށްފައިވެ އެވެ.
ކައުންސިލާއެކު ބޭއްވުނު ބައްދަލުވުމުގައި އެންވަޔަރަންމަންޓް މިނިސްޓްރީގެ ފަރާތުން ބުނީ މިމަޝްރޫޢު ފެށުމަށްޓަކައި ގްރީން ކްލައިމެޓް ފަންޑް (ޖީސީއެފް) އަށް ހުށަހަޅަން ޖެހޭ ޕްރޮޖެކްޓް ކޮންސެޕް ނޯޓް ތައްޔާރު ކުރުމަށް ބޭނުންވާ މަޢުލޫމާތު އެއް ކުރުމަށް އެ މިނިސްޓްރީ އާއި ޖައިކާގެ ޓީމުން އައްޑޫގެ ގޮނޑުދޮށްތައް ޙިމާޔަތް ކުރަން މިހާރު ކުރެވެމުންދާ މަސައްކަތްތަކުގެ މަޢުލޫމާތު އެއްކޮށް، އެ ސަރަހައްދުތަކަށް ޒިޔާރަތް ކުރުމަށް ހަމަޖެހިފައިވާ ކަމަށެވެ.
އެހެންވެ ބައްދަލުވުމުގައި ކައުންސިލުން ވަނީ އައްޑޫގެ ގޮނޑުދޮށްތަކުގެ ހާލަތާ ގުޅޭ މަޢުލޫމާތު ހިއްސާކޮށްފަ އެވެ.