އުރަމަތީގެ ކެންސަރާ މެދު އާންމުންގެ ހޭލުންތެރިކަން އިތުރުކުރުމަށް ބާއްވާ "ޕިންކް ރިބަން ރަން ވޯކް 2017"، އަންނަ ހޮނިހިރު ދުވަހު އައްޑޫގައި އޮންނާނެ އެވެ.
މިކަން އިންތިޒާމްކުރަނީ ކެންސަ ސޮސައިޓީ އޮފް މޯލްޑިވްސް އާއި ބޭންކް އޮފް މޯލްޑިވްސް (ބީއެމްއެލް) ގުޅިގެންނެވެ.
ކެންސަރާ މެދު އާންމުން ހޭލުންތެރިކުރުމަށް ބާއްވާ ދުވުން އަދި ހިނގާލުމުގެ މި ހަރަކާތް ހިތަދޫ އަވަށުގައި ކުރިއަށް ގެންދިޔުމަށް ހަމަޖެހިފައި ވަނީ ހިތަދޫ ސްކޫލުން ފެށިގެން އައްޑޫ ސިޓީ ކައުންސިލްގެ އިދާރާއާ ހަމައަށެވެ. މަރަދޫ، މަރަދޫފޭދޫ އަދި ފޭދޫ އަވަށުގެ ހަރަކާތް ފެށޭނީ މަރަދޫ ޕާރކް ސަރަހައްދުން ފެށިގެން ފޭދޫ ބަނދަރު ސަރަހައްދާ ހަމައަށެވެ. އަދި ހުޅުދު އާއި މީދޫ އަވަށުގެ ހަރަކާތް ފެށުމަށް ހަމަޖެހިފައި ވަނީ ހުޅުމީދޫ ސިއްޙީ މަރުކަޒު ކުރިމަތިންނެވެ.
ރާއްޖޭގެ 28 ރަށެއްގައި ކުރިޔަށް ގެންދަން ރާވާފައިވާ މިހަރަކާތް ފަށާނީ ހޮނިހިރު ދުވަހުގެ ހަވީރު 4:00 ގަ އެވެ.
މިހަރަކާތުގެ ތެރެއިން ދުވަހާއި ގުޅޭ ޓީޝާޓް ވިއްކުމަށް ވެސް ވަނީ ހަމަޖެހިފައެވެ. ކެންސަ ސޮސައިޓީގެ ފޯކަލް ޕޮއިންޓުގެ ގޮތުގައި މިހަރަކާތަށް ކަނޑައަޅާފައިވާ ހިތަދޫ ރީޖަނަލް ހޮސްޕިޓަލް، ދަމަނަވެށި، މަރަދޫ ސިއްޙީ މަރަކަޒު، މަރަދޫފޭދޫ ސިއްޙީ މަރުކަޒު، ފޭދޫ ސިއްޙީ މަރުކަޒު އަދި ހުޅުމީދޫ ސިއްޙީ މަރުކަޒުން ޓީޝާޓް ގަންނަން ލިބޭއިރު ޓީޝާޓެއް ވިއްކުމަށް ހަމަޖެހިފައި ވަނީ 150ރ. އަށެވެ.
ބްރެސްޓް ކެންސަ އެވައާނެސް މަހުގެ ގޮތުގައި އޮކްޓޯބަރު މަސް ފާހަގަކުރާއިރު ކެންސަ ސޮސައިޓީ އޮފް މޯލްޑިވްސްއިން ކޮންމެ އަހަރަކުވެސް އޮކްޓޯބަރު މަހު މާލޭގައި "ޕިންކް ރިބަން ރަން ވޯކް" މި ނަމުގައި ޚާއްސަ ހަރަކާތެއް ބާއްވަ އެވެ.