ނެޝަނަލް ޑިޒާސްޓަ މެނޭޖްމަންޓް ސެންޓަރު (އެންޑީއެމްސީ) އިން އިންތިޒާމްކޮށްގެން ބާއްވާ ކާރިސާގެ ކަންކަން ބެލެހެއްޓުމުގެ ޤައުމީ މަންސަގައި އައްޑޫ ސިޓީ ކައުންސިލުން ބައިވެރިވެއްޖެ އެވެ.
ކައުންސިލްގެ ފަރާތުން ބައްދަލުވުމުގައި ބައިވެރިވެވަޑައިގަންނަވަނީ ޑެޕިއުޓީ މޭޔަރު މުޙައްމަދު ޔަސްރިފެވެ.
ބަނޑޮސް އައިލެންޑް ރިސޯޓްގައި ދެ ދުވަހުގެ މުއްދަތަށް ކުރިއަށްދާ މިމަސައްކަތު ބައްދަލުވުމަކީ ކާރިސާއެއް ދިމާވެދާ ހާލަތްތަކުގައި ކުރިމަތިވާ ގޮންޖެހުންތަކާއި މައްސަލަތައް ދަނެގަނެ އެފަދަ ކަންކަން ހައްލު ކުރުމަށްޓަކައި ކުރެވެން ހުރި ކަންކަމާ ގުޅޭ ގޮތުން މަޝްވަރާ ކުރުމެވެ. ހަމައެއާ އެކު އެފަދަ ހާލަތްތަކުގައި ގެންގުޅެން ޖެހޭ ހަރުދަނާ ސިޔާސަތުއް ކަނޑައަޅައި، ރައްޔިތުން ކާރިސާތަކަށް ސަމާލުކުރުވައި، ދުރާލާ އިންޒާރާއި ލަފާދެވޭ ނިޒާމެއްގެ ތެރެއިން ކަންކަން ރާވައި ހަރުދަނާ ނިޒާމެއް ޤާއިމް ކުރުމެވެ.
މި ބައްދަލުވުމުގައި ސަރުކާރުގެ ކަމާ ގުޅުން ހުރި މުޢައްސަސާތަކާއި، ކުންފުނިތަކާއި،އަމިއްލަ ޖަމްޢިއްޔާތަކުން ބައިވެރިވެ އެވެ. ބޭނުމަކީ ކާރިސާއެއްގެ ހާލަތުގައި ކަންކަން ބެލެހެއްޓުމުގެ މަސައްކަތް ހުރިހާ ދާއިރާއެއް ވެސް ގުޅިލާމެހިގެން މަސައްކަތް ކުރެވޭނެ ގޮތްތައް ރޭވުމެވެ.