މާދަމާ ރޭ އޮލިމްޕަހުގައި ޕްރިމިއާ ކުރާ ކްރިސްޓަލް އެންޓަޓައިންމަންޓްގެ ފިލްމް އަންނަ މަހު އައްޑޫގައި އަޅުވާ ގޮތަށް ހަމަޖައްސައިފި އެވެ.
މި ފިލްމް އައްޑޫގައި އެޅުވާ ޓީމްގެ އޮފިޝަލަކު "އައްޑު ލައިވް" އަށް ބުނީ "ބޮސް" ގެ ދެ ޝޯ އަންނަ މަހުގެ 16 އާއި 17 ގައި މަރަދޫ ބޮޑޮގޭގައި ދައްކަން ހަމަޖެހިފައިވާ ކަމަށެވެ.
"އެ ދެ ޝޯގެ އިތުރަށް ފިލްމަށް ލިބޭ ތަރުހީބަށް ބަލާފައި އަހަރަމެން ޝޯތައް އިތުރު ވެސް ކުރާނަން،" އޮފިޝަލް ބުންޏެވެ.
އައްޑޫގައި ދައްކާ ޝޯތަކުގެ ޓިކެޓަށް މިހާރު ވަނީ ނަން ނޯޓް ވެސްކޮށް ދޭން ފަށައިފަ އެވެ. ގުޅަން ޖެހޭ ނަމްބަރުތަކަކީ 7845584 އަދި 7414404 އެވެ.
"ބޮސް" އަކީ މިދިޔަ އަހަރު ބިރުވެރި ފިލްމް "4426" ގެނެސް ދިން ޑައިރެކްޓަރު ފާތުމަތު ނަހުލާ ލިޔެ، ޕްރޮޑިއުސްކޮށްފައިވާ އަސަރު ގަދަ ލޯބީގެ ފިލްމެކެވެ.
އައިޝަތު ރިޝްމީ ޑައިރެކްޓްކޮށްފައިވާ މި ފިލްމްގައި ލީޑް ރޯލް ކުޅެފައި ވަނީ ރިޝްމީގެ ކޮއްކޮ މަރިޔަމް އައްޒައާ އެކު، އަލަށް ތައާރަފުވާ މުހައްމަދު ޔުނާން އެވެ. ފިލްމްގެ އިތުރު ކާސްޓުންގެ ތެރޭގައި ފާތުމަތު އާޒިފާ (އަޒޫ)، އަލީ އާޒިމް (ދޮންއައްޔަ)، އިބްރާހީމް ޖިހާދު (ޖިމީ) އަދި އަލީ ޝަމީލް ހިމެނެ އެވެ.
އައްޑޫގައި އެންމެ ފަހުން އެޅުވި ފިލްމަކީ ސެޕްޓެމްބަރުގައި ރިލީޒް ކުރި "ހައްދު" އެވެ.