މާދަމާ ރޭ އޮލިމްޕަހުގައި ޕްރިމިއާ ކުރާ ފިލްމް "ބޮސް" އަންނަ މަހުގެ ތެރޭގައި އައްޑޫގައި އަޅުވަން ނިންމައި، މިއަދު ޓިކެޓް ބުކްކޮށް ދޭން ފެށުމާ އެކު ދެ ގަޑިއެއްހާ އިރުގެ ތެރޭގައި ފުރަތަމަ ޝޯ ފުލްވެއްޖެ އެވެ.
އައްޑޫގައި "ބޮސް" ދައްކަން ހަމަޖެއްސީ އަންނަ މަހުގެ 16 އާއި 17 ވަނަ ދުވަހުގެ ރެ އެވެ.
މަރަދޫ ބޮޑޮގޭގައި ފިލްމް އަޅުވަން ހަވާލުވި ޓީމްގެ އޮފިޝަލަކު މިއަދު ބުނީ ހީކުރި ވަރަށް ވުރެ "ބޮސް" އަށް ލިބޭ ތަރުހީބު ބޮޑު ކަމަށެވެ.
"އެހެންވެ މިހާރު މިދާ ގޮތުން ދެ ޝޯ އަށް ވުރެ އިތުރަށް އައްޑޫގައި ޝޯތައް ދައްކަން ޖެހޭނެ ކަމަށް މި ގަބޫލު ކުރެވެނީ،" އޭނާ ބުންޏެވެ. "ޓިކެޓް ނޯޓްކޮށް ދޭން ފެށިތާ ދެ ގަޑިއެއްހާ އިރުގެ ތެރޭގައި ފުރަތަމަ ޝޯ މިއޮތީ ފުލްވެފައި."
އޮފިޝަލް ބުނީ މިއީ އައްޑޫގައި އެ މީހުން ދިވެހި ފިލްމްތައް އަޅުވަން ފެށި ފަހުން، ފިލްމެއްގެ ޓިކެޓް މިހާ އަވަހަށް ހުސްވި ފުރަތަމަ ފަހަރު ކަމަށެވެ.
"އެހެންވެ ކުރިއަށް އޮތް ޝޯ އަށް ވެސް ވީހާ ވެސް އަވަހަކަށް ނަން ނޯޓް ކުރަން އެދެން. އެހެން ނޫނީ ވަރަށް އުނދަގޫ ވާނެ ޓިކެޓް ހޯދަން،" އޭނާ ބުންޏެވެ.
އައްޑޫގެ ޝޯތަކުގެ ނަން ނޯޓް ކުރަން ޖެހޭ ނަމްބަރުތަކަކީ 7845584 އަދި 7414404 އެވެ.
"ބޮސް" އަކީ މިދިޔަ އަހަރު ބިރުވެރި ފިލްމް "4426" ގެނެސް ދިން ޑައިރެކްޓަރު ފާތުމަތު ނަހުލާ ލިޔެ، ޕްރޮޑިއުސްކޮށްފައިވާ އަސަރު ގަދަ ލޯބީގެ ފިލްމެކެވެ.
އައިޝަތު ރިޝްމީ ޑައިރެކްޓްކޮށްފައިވާ މި ފިލްމްގައި ލީޑް ރޯލް ކުޅެފައި ވަނީ ރިޝްމީގެ ކޮއްކޮ މަރިޔަމް އައްޒައާ އެކު، އަލަށް ތައާރަފުވާ މުހައްމަދު ޔުނާން އެވެ. ފިލްމްގެ އިތުރު ކާސްޓުންގެ ތެރޭގައި ފާތުމަތު އާޒިފާ (އަޒޫ)، އަލީ އާޒިމް (ދޮންއައްޔަ)، އިބްރާހީމް ޖިހާދު (ޖިމީ) އަދި އަލީ ޝަމީލް ހިމެނެ އެވެ.