މިރޭ އޮލިމްޕަހުގައި ޕްރިމިއާ ކުރާ ފިލްމް "ބޮސް" ގެ ދެ ޝޯ އަންނަ މަހު އައްޑޫގައި އަޅުވަން ނިންމައި، އިއްޔެ ޓިކެޓް ބުކްކޮށް ދޭން ފެށުމާ އެކު ކުޑަ ވަގުތުކޮޅެއްގެ ތެރޭގައި ފުރަތަމަ ދެ ޝޯ ވެސް ފުލްވުމާ ގުޅިގެން އިތުރު ދެ ޝޯ އަށް ނަން ނޯޓް ކުރަން ހުޅުވާލައިފި އެވެ.
މަރަދޫ ބޮޑޮގޭގައި އަންނަ މަހުގެ 16 އާއި 17 ގައި ދައްކާ ދެ ޝޯ ފުލްވެގެން މިހާރު ނަން ނޯޓްކޮށް ދެނީ 18 އާއި 19 ވަނަ ދުވަހުގެ ރޭ ދައްކާ ޝޯތަކުގެ ޓިކެޓެވެ. "ބޮސް" ވެގެން ގޮސްފައި ވަނީ އައްޑޫގައި ޓިކެޓަށް ހުޅުވައިލުމާ އެކު، މިހާތަނަށް އެންމެ ބޮޑު ތަރުހީބެއް އާންމުންގެ ފަރާތުން ލިބުނު ފިލްމަށެވެ.
ޓިކެޓް ނޯޓް ކުރަން ގުޅަން ޖެހޭ ނަމްބަރުތަކަކީ 7845584 އަދި 7414404 އެވެ.
"ބޮސް" އަކީ މިދިޔަ އަހަރު ބިރުވެރި ފިލްމް "4426" ގެނެސް ދިން ޑައިރެކްޓަރު ފާތުމަތު ނަހުލާ ލިޔެ، ޕްރޮޑިއުސްކޮށްފައިވާ އަސަރު ގަދަ ލޯބީގެ ފިލްމެކެވެ.
އައިޝަތު ރިޝްމީ ޑައިރެކްޓްކޮށްފައިވާ މި ފިލްމްގައި ލީޑް ރޯލް ކުޅެފައި ވަނީ ރިޝްމީގެ ކޮއްކޮ މަރިޔަމް އައްޒައާ އެކު، އަލަށް ތައާރަފުވާ މުހައްމަދު ޔުނާން އެވެ.
ފިލްމްގެ އިތުރު ކާސްޓުންގެ ތެރޭގައި ފާތުމަތު އާޒިފާ (އަޒޫ)، އަލީ އާޒިމް (ދޮންއައްޔަ)، އިބްރާހީމް ޖިހާދު (ޖިމީ) އަދި އަލީ ޝަމީލް ހިމެނެ އެވެ.