މި އަހަރު ރިލީޒް ކުރި ފިލްމްތަކުގެ ތެރެއިން ބޮކްސް އޮފީހުގައި އެންމެ ބޮޑު އާމްދަނީއެއް ހޯދި އެއް ފިލްމް ކަމަށްވާ އެސްއެސް ރާޖަމޯލީގެ "ބާހްބަލީ 2" ޝޫޓް ކުރަން ހައިދަރްއާބާދުގައި ހެދި ބިޔަ އަދި އަގު ބޮޑު ސެޓްތަކުގެ ތެރެއިން ސެޓެއް ތީމް ޕާކެއްގެ ގޮތުގައި ޓޫރިސްޓުންނަށް ހުޅުވާލައިފި އެވެ.
އެއްހާސް އަކަމީޓަރުގެ ސަރަހައްދަކަށް ފެތުރިފައިވާ މި ތީމް ޕާކް ހުރީ ބާހްބަލީ ޝޫޓް ކުރި ރަމޯޖީ ފިލްމް ސިޓީގަ އެވެ.
ފިލްމްގައި ދައްކާ މަހިޝްމަތީ ކިންގްޑަމްގެ މަންޒަރުތައް ހަމަލޮލުން ބަލަލާން ބޭނުން ކޮންމެ މީހަކަށް މިހާރު އެ ފުރުސަތު ހުޅުވާލައިފައިވާ އިރު، އެތަނަށް ވަދެވެނީ ޓިކެޓް ނަގައިގެންނެވެ. ޓިކެޓް ވިއްކަނީ 1،250 ރުޕީސްއަށާއި 2،400 ރުޕީސްއަށެވެ.
ރަމޯޖީ ސިޓީގެ އޮފިޝަލަކު ބުނީ "ބާހްބަލީ" ގެ ސެޓަށް 60 ކްރޯޑް ރުޕީސް ހަރަދުކޮށްފައިވާ ކަމަށާއި މި ސެޓް ބަލާލަން ބޭނުންވާ މީހުންނަށް ވަރަށް ފުރިހަމަ މަންޒަރުތަކެއް ފެނިގެން ދާނެ ކަމަށެވެ.
"މިއީ އަހަރެމެން މި ފިލްމް ކުރި ބުރަ އަދި ބޮޑު މަސައްކަތް ވެސް ހަމަ ލޮލުން ބަލާލެވޭނެ ފުރުސަތެއް،" އޭނާ ބުންޏެވެ. "މިތަން ހުޅުވާލި ފަހުން ވަރަށް ގިނަ ބަޔަކު ޒިޔާރަތްކޮށް، މި ތަނުގެ ފުރިހަމަކަން އެބަ ތަޖުރިބާކޮށްލާ މިހާރު."
"ބާހްބަލީ" ގެ ސެޓް ޑިޒައިން ކުރީ ނެޝަނަލް އެވޯޑް ހޯދާފައިވާ ސަބޫ ސައިރިލް އެވެ.
އިންޑިއާގައި މިހާތަނަށް އުފެއްދި އެންމެ މޮޅެތި ފިލްމްތަކުގެ ތެރޭގައި ހިމެނޭ "ބާހްބަލީ" ދެ ފިލްމެއްގގެ ގޮތުގައި ގެނެސް ދިން އިރު މީގެ ކާސްޓުންގެ ތެރޭގައި ޕްރަބާސް، އަނުޝްކާ ޝެޓީ، ރާނާ ދަގޫޕަތީ، ތަމަންނާ ބާޓިއާ އަދި ރާމިއާ ހިމެނެ އެވެ.
މީގެ ކުރިން ވެސް އިންޑިއާގެ އެހެން ފިލްމެއްގެ ބިޔަ ސެޓް ޓޫރިސްޓުންނަށް ހުޅުވައިލި އެވެ. އެއީ 2008 ގައި ރިލީޒް ކުރި ރިތިކް ރޯޝަނާއި އައިޝްވާރިއާ ރާއީގެ ފިލްމް "ޖޯދާ-އަކްބަރު" ގެ އަގު ބޮޑު ސެޓެވެ.