އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އިން އަރަބި ބަހަށް ހާއްސަކޮށްގެން ކޯސްތަކެއް ތައާރަފުކޮށްފި އެވެ.
ތައާރަފް ކުރި ކޯސްތަކުގެ ތެރޭގައި ހާރިޖީ ދާއިރާގައި މަސައްކަތް ކުރާ މީހުންނަށް ހާއްސަކޮށް ޑިޕްލޮމާ އިން އަރަބިކް ލޭންގްވިޖް ފޯ ޑިޕްލޮމެސީ، ފަތުރުވެރިކަމުގެ ދާއިރާ އަށް ޑޮޕްލޮމާ އިން އަރަބިކް ލޭންގްވިޖް ފޯ ހޮސްޕިޓާލިޓީ އެންޑް ޓޫރިޒަމް ޕްރޮގްރާމް ހިމެނެ އެވެ.
އަދި ޑިޕްލޮމާއިން އަރަބިކް ލޭންގްއޭޖް ފޯ އިސްލާމިކް ސްޓަޑީޒް ޕްރޮގްރާމާއި، ނޫސްވެރިންނަށް ހާއްސަކޮށްގެން ކުރިއަށް ގެންދާ ޑިޕްލޮމާ އިން އަރަބިކް ލޭންގްއޭޖް ފޮ ޖާނަލިޒަމް އެންޑް މީޑިއާ ކޯސް ވެސް ހިމެނެ އެވެ.
އައިޔޫއެމްގެ ޗާންސެލަރު ޑރ. މުހައްމަދު ޝަހީމް އަލީ ސައީދު ވިދާޅުވީ އަރަބި ބަހަކީ މީހުންގެ ދިރިއުޅުމާއި ވިޔަފާރިއާ ދީނީ ކަންތައްތަކުގެ އިތުރަށް އިގްތިސާދާއި އަދި ބައިނަލްއަގްވަމީ ގުޅުންތަކާއި ގުޅިފައިވާ ބަހެއް ކަމަށެވެ. އެހެންވެ އެ ބަސް އުނގެނުމަކީ ވަރަށް ބޭނުންތެރި ކަމެއް ކަމަށް ވިދާޅުވި އެވެ.
އައިޔޫއެމް އިން ބުނީ އޯ ލެވެލްގެ ތިން ފާސް އޮތުމުން މިހާރު ޑިޕްލޮމަ ކޯހަށް ކުރިމަތިލެވޭނެ ކަމަށާއި،ގިނަ މީހުންނަށް ފުރުސަތު ދިނުމަކީ އައިޔޫއެމްގެ މަގުސަދެއް ކަމަށެވެ. ޑިޕްލޮމާގެ ދެ އަހަރުގެ ތެރެއިން ފުރަތަމަ އަހަރު ނިމުމުން އެޑްވާންސް ސެޓްފިކެޓް ލިބޭނެ އެވެ.
އައިޔޫއެމުން ފަސް ދާއިރާއަކުން މުޅިން އަލަށް 17 ކޯހެއް ތައާރަފުކޮށްފައިވާ އިރު މުޅި ޖުމްލަ 50 ކޯހަކަށް ކުރިމަތިލުމަށް ވަނީ ފުރުސަތު ހުޅުވާލައިފަ އެވެ. އެގޮތުން އެކޯސްތަކަކީ ޕީއެޗްޑީ، މާސްޓާސް ހަޔް ކޯސް، ޕޯސްޓް ގްރެޖްއޭޓްގެ ދެ ކޯސް، ބެޗްލާސް ޑޮގްރީ ލެވަލްގެ 10 ކޯސް، ޑިޕްލޮމާރ ކޯހުގެ 13 ކޯސް، ސެޓްފިކެޓް ލެވަލްގެ 1-4 އަށް 17 ކޯހެވެ.
މިކޯސްތަކަށް ކުރިމަތިލުމުގެ ފުރުސަަތު އަންނަ މަހުގެ 14 ވަނަ ދުވަހާ ހަމައަށް ވަނީ ހުޅުވާލައިފަ އެވެ.
އައިޔޫއެމް އިން މިހާރު އަންނަނީ އައްޑު އާއި ފުވައްމުކުގައި އެ ޔުނިވަސިޓީގެ ކެމްޕަސްތަކެއް ވެސް ގާއިމު ކުރަން މަސައްކަތް ކުރަމުންނެވެ.