މިނިވަން ޗެމްޕިއަންޝިޕްގައި ފޭދޫ ޓީމުން ވިދާލި އިބްރާހިމް މަހުދީ ހުސެއިން (ހަބޭސް އިއްބެ) އަށް ގައުމީ ސްކޮޑުން އަނެއްކާ ވެސް ޖާގަ ދީފި އެވެ.
އިއްބެ ގައުމީ ސްކޮޑަށް ނަގާފައިވަނީ މިއަންނަ އަންގާރަ ދުވަހު ދިވެހި ގައުމީ ޓީމާއި ފަލަސްތީނުގެ ގައުމީ ޓީމު ކުޅޭ މެޗަށެވެ. އެފްއޭއެމުން މި މެޗުގެ ރަސްމީ ސްކޮޑު އަދި އިއުލާންކޮށްފައި ނުވިނަމަވެސް އިއްބެ ވަނީ ގައުމީ ޓީމާއެކު ފަރިތަކުރުންތަކުގައި ބައިވެރިވެފައެވެ.
ޓީސީ ސްޕޯޓްސް ކުލަބަށް ކުޅެމުން އަންނަ އިއްބެ ވަނީ މިސީޒަނުގައި ތަފާތު މޮޅު ކުޅުމެއް ކުލަބަށް ދައްކާފައެވެ. ސީޒަނުގެ މިހާތަނަށް އިއްބެ ވަނީ 14 ލަނޑު ޖަހާފައެވެ.
ބަންގްލަދޭޝްގައި ބޭއްވި ޝެއިޚު ކަމާލު ކަޕުގައިވެސް އިއްބެގެ ފަރާތުން ރަނގަޅު ކުޅުމެއް ފެނިގެން ގޮސްފައިވާއިރު ޓީސީ ވަނީ އެމުބާރާތް ކާމިޔާބުކޮށް ދިވެހި ކުލަބަކުން ރާއްޖޭން ބޭރުގެ މުބާރާތެއް ކާމިޔާބުކުރި ފުރަތަމަ ޓީމުގެ ލަގަބު ހޯދާފައެވެ.