އަންނަ މަހު ރިލީޒް ކުރަން ހަމަޖެހިފައިވާ ސަލްމާން ހާނާއި ކެޓްރީނާ ކެއިފްގެ ފިލްމް "ޓައިގާ ޒިންދާ ހޭ" ގެ ޓްރެއިލާ މިއަދު ދައްކާލައިފި އެވެ.
މި ފިލްމަކީ ސަލްމާން މިހާތަނަށް ކުޅުނު ފިލްމްތަކުގެ ތެރެއި އެންމެ ކާމިޔާބު ފިލްމް ކަމަށްވާ "ސުލްތާން" ގެ ޑައިރެކްޓަރު އަލީ އައްބާސް ޒަަފަރު ލިޔެ، ޑައިރެކްޓްކޮށްފައިވާ ފިލްމެކެވެ.
މިއީ 2012 ގައި ސަލްމާނާއި ކެޓްރީނާ ކުޅުނު ފިލްމް "އޭކް ތަ ޓައިގާ" ގެ ދެވަނަ ބައެވެ. އެ ފިލްމް ޑައިރެކްޓްކޮށްފައި ވަނީ ކަބީރް ހާނެވެ.
ވަރަށް ވަރުގަދަ އެކްޝަންތަކެއް ވެސް ހިމެނޭ "ޓައިގާ ޒިންދާ ހޭ" ސިނާމަތަކަށް އަންނާނީ އަންނަ މަހުގެ 22 ގަ އެވެ. މި ފިލްމަކީ ޔާޝް ރާޖް ފިލްމް (ވައިއާރްއެފް) އިން އުފައްދާފައިވާ ފިލްމެކެވެ.
މީގެ ކާސްޓުންގެ ތެރޭގައި ޕަރޭޝް ރާވަލް އާއި އަންގަދު ބޭދީ އަދު ތަމަޅަ އެކްޓަރު ސުދީޕް ވެސް ހިމެނެ އެވެ.
ސަލްމާންގެ އެންމެ ފަހުން ރިލީޒްވި ފިލްމަކީ ކަބީރު ޑައިރެކްޓްކޮށް، މިއަހަރުގެ ފިތުރު އީދުގައި ނެރުނު "ޓިއުބްލައިޓް" އެވެ. އެކަމަކު އެއީ ބޮޑު ފްލޮޕެކެވެ.