މި މަހުގެ 14 ވަނަ ދުވަހު ފާހަގަ ކުރާ ވޯލްޑް ޑައިބެޓީޒް ދުވަހާ ގުޅުވައިގެން އައްޑޫގައި ބައިސް ދުއްވުމުގެ ހަރަކާތެއް ބާއްވަން ނިންމައިފި އެވެ.
ބައިސްކަލް ދުއްވާ އެންމެންނަށް ހުޅުވާލައިގެން ބާއްވާ މި ހަރަކާތް ފަށަން ހަމަޖެހިފައި ވަނީ 14 ވަނަ ދުވަހު ހަވީރު 4:30 ގައި މަރަދޫފޭދޫގައި ހުންނަ ދަމަނަވެށި ކުރިމަތިންނެވެ. އެހެންވެ މީގައި ބައިވެރިވާން ބޭނުންވާ މީހުން އެ ދުވަހު އެ ގަޑި އަށް ހާޒިރު ވާން ޖެހޭ ކަމަށް މިކަން އިންތިޒާމް ކުރާ ދަމަނަވެށިން ބުންޏެވެ.
ދުނިޔޭގެ ހަކުރު ބަލީގެ ދުވަހާ ގުޅިގެން ކުރާ ކަންކަމުގެ ތެރޭގައި 14 ވަނަ ދުވަހު އޮފީސްތަކުގައި، އޮފީސް މަސައްކަތް ފެށުމުގެ އެއް ގަޑި އިރު ކުރިން އޮފީސްތެރޭގައި މުވައްޒަފުން ކަސްރަތު ކުރަން ޖެހެ އެވެ. އަދި އެ ދުވަހު ލާން ޖެހެނީ ނޫކުލައިގެ ހެދުމެވެ.
ދަމަނަވެށީގެ ކޮމިއުނިޓީ ހެލްތު އޮފިސަރު އަދި ބައިސްކަލް ހަރަކާތުގެ ކޯޑިނޭޓަރު އިހްތިޝާމް ނަޖީބް ވިދާޅުވީ ބައިސްކަލް ބުރު ފޭދޫން ފެށިގެން ގޮސް މަރަދޫ ވަށައި ޖަހަން ހަމަޖެހިފައިވާ ކަމަށެވެ.
އޭނާ ވިދާޅުވީ ބައިސްކަލް ހަރަކާތަކީ ކަސްރަތުގެ މުހިއްމު ކަމާއި ހަރަކާތްތެރިވެ އުޅުމުގެ މުހިއްމުކަން އަންގައި ދިނުމުގެ ގޮތުން ބާއްވާ ހަރަކާތެއް ކަމަށެވެ.
އެހެންވެ ވީހާ ވެސް ގިނަ ބަަޔަކު މީގައި ބައިވެެރިވާން ދަމަނަވެށިން އެދެ އެވެ.