ކުރީގެ ރައީސް މުހައްމަދު ނަޝީދަށް މަޢާފު ދެއްވުން ނޫން ގޮތެއް ނެތް ކަމަށް ރައީސް އަބްދުﷲ ވިދާޅުވެފައިވާ ކަމަށް ތިމަރަފުށީ ދާއިރާގެ މެންބަރު މުހައްމަދު މުސްތަފާ ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުން މާލޭގައި މިރޭ ބާއްވަމުން ގެންދާ ޖަލްސާގައި ވާހަކަ ދައްކަވަމުން މުސްތަފާ ވިދާޅުވީ، ރައީސް ޔާމީން އެގޮތަށް ވިދާޅުވި އިރު އެބޭފުޅާގެ އިތުރުން އޭދަފުށީ ދާއިރާގެ މެމްބަރު އަހުމަދު ސަލީމް ވެސް ހުންނެވި ކަމަށެވެ.
މުސްތަފާ މިހެން ވިދާޅުވެފައިވަނީ ނަޝީދު އަމިއްލަފުޅަށް އަންނަ އަހަރު ބޭއްވޭ ރިޔާސީ އިންތިޚާބުގައި އެމަނިކުފާނަށް ވާދަކުރެއްވޭނެ ކަމުގެ ޔަގީންކަން އެބަ އޮތް ކަމަށް ވިދާޅުވެފައިވަނިކޮށެވެ.
ޓެރަރިޒަމްގެ ކުށް ސާބިތުވެ 13 އަހަރަށް ޖަލަށް ލުމަށް ހުކުމްކޮށްފައިވާ ނަޝީދަށް ހުކުމް ތަންފީޒުކުރާއިރު ވެރިކަމަށް ކުރިމަތި ނުލެވޭނެއެވެވެ. ނަޝީދު ވިދާޅުވެފައިވަނީ މިހާރު ރާއްޖެއިން އިންޑިޔާއާ އެމެރިކާއާ އެކު ކުރަމުންދާ މަޝްވަރާ ނިމޭއިރު އެމަނިކުފާނަށް އިންތިޚާބުގައި ވާދަކުރެވޭނެކަން ސަރުކާރުން އިއުލާނު ކުރާނެ ކަމަށެވެ.
ނަމަވެސް ސަރުކާރުގެ ފަރާތުން ފިޝަރީޒް މިނިސްޓަރު ޑރ. ޝައިނީ ވަނީ ނަޝީދު ދެއްކެވި ހުރިހާ ވާހަކައެއް ދޮގުކޮށްފައެވެ. މިނިސްޓަރު ވިދާޅުވެފައިވަނީ ނަޝީދާ ބެހޭގޮތުން ރާއްޖެއިން މަޝްވަރާއެއްވެސް ނުކުރާ ކަމަށާއި އިންތިޚާބުގައި އެމަނިކުފާނަށް ވާދަކުރެވޭނެ އެއްވެސް ފުރުސަތެއް ނެތް ކަމަށެވެ.