ހިތަދޫ ޒަމާނީގޭ ތުއްތު ދީދީ (އަބްދުލް މަޖީދުގެ އަލި ދީދީގެ އިބްރާހިމް އަލިދީދީ) އިއްޔެގެ ވަގުތެއްގައި ނިޔާ ވުމާއި ގުޅިގެން އެމްޑީޕީ އާއި ކުރީގެ ރައީސް ނަޝީދު އެމަރުހޫމްގެ އާއިލާއަށް ތައުޒީޔާ ކިޔައިފިއެވެ.
ރައީސް ނަޝީދުގެ ސަރުކާރުގެ ޑިޒާސްޓަރ މެނޭޖްމަންޓް ހިންގެވި ސްޓޭޓް މިނިސްޓަރު ފޯ ހައުސިން، ޓްރާންސްޕޯޓް އެންޑް އެންވެޔަރަމެންޓް އަބްދުﷲ ޝާހިދު އާއި ނަޝީދު ސަރުކާރުގެ ހައުސިން މިނިސްޓރީގެ ނައިބްކަން ކުރެއްވި ހުސެއިން ޝާހިދުގެ ބައްޕަ ނިޔާވީ އާލާސްކަންފުޅާއި އުޅުއްވުމަށްފަހު އިއްޔެގެ ހެދުނުގެ ވަގުތެއްގައި މާލެއަށެވެ.
ތުއްތު ދީދީ އަކީ ތަޢުލީމީ ދާއިރާގައި އަގުހުރި ޚިދްމަތްތަކެއް ކުރެއްވި ބޭފުޅެކެވެ. މިހާރުގެ ހިތަދޫ ސްކޫލް ގެ ފެށުން ވެފައިވަނީ 1975 ވަނަ އަހަރު އަމިއްލަ ގެކޮޅު ކަމުގައިވާ ހިތަދޫ ކޮމަންޑޫގޭގައި ތުއްތު ދީދީ ފެއްޓެވި އައްޑޫ އިންގްލިޝް ސްކޫލެވެ. އެ ސްކޫލްގެ ނާޒިރެއްކަމުގައި މަޖީދިއްޔާ ސްކޫލްގައި ގިނަ އަހަރުތަކެއް ޚިދްމަތް ކުރެއްވި މިސްޓަރ ޖޭވީ ހިލް ގެންނަވައި ސްރީލަންކާގެ އިތުރު ތިން ޓީޗަރުންނާއި އަދި މާލެއިންވެސް ދެ ޓީޗަރަކު އައްޑޫ އިންގްލިޝް ސްކޫލުގައި ކިޔަވައި ދެއްވުމަށް ތުއްތު ދީދީ ހަމަޖެއްސެވިކަން އެއީ އައްޑޫ ސިޓީގެ ރައްޔިތުންނާއި މުޅި ރާއްޖޭގެ ތަޢުލީމީ ދާއިރާގެ ތާރީޚްގައި ރަން އަކުރުން ފަވާލެވޭނެ ޚިދްމަތްތަކެކެވެ.
އައްޑޫ އިންގްލިޝް ސްކޫލްގެ ގެހިންގެވުން އަތޮޅުކޮމިޓީން ބަލަހައްޓަވާ ގޮތަށް ހަމަޖައްސަވައިގެން ވިއްސަކަށް އަހަރު ތުއްތުދީދީ ހަމަޖެއްސެވި އިންތިޒާމްގެ ދަށުން ހިންގަވާފައިވާކަމީ މިހާރު ގެ ހިތަދޫ ސްކޫލްގެ ތަރައްގީ ރަމްޒުކޮށްދޭ އަގުހުރި ހިއްޞާއެކެވެ.
ހިތަދޫ ޒަމާނީގޭ ތުއްތު ދީދީ ވަނީ އައްޑޫ އާރއޭއެފް ގައި ފޯމަނެއްގެ ވަޒީފާ އަދާކުރެއްވުމަށް ފަހު 1978 އަދި 1979 ގައި މާލޭ އިންޓަރނޭޝަނަލް އެއަރޕޯޓް ބައިނަލްއަގުވާމީ ފެންވަރަށް ސަރުކާރުން ތަރައްގީކުރެއްވުމުގެ މަސައްކަތުގައި ގިނަ ޚިދްމަތްތަކެއް ކުރައްވާފައެވެ. އޭގެ ފަހުން ތުއްތުދީދީ ވަނީ ޓުއަރިޒަމާއި މަސްވެރިކަމުގެ ދާއިރާގައިވެސް މަސައްކަތްތަކެއް ކުރައްވަމުން ގެންދަވާފައެވެ.
އަލްމަރުހޫމް އިބްރާހީމް ޢަލީ ދީދީ (ތުއްތު ދީދީ) އަވަހާރަވީއިރު ދަރިކަނބަލަކާއި ހަތަރު ދަރިކަލުން އެބަތިއްބެވިއެވެ.
އަލްމަރުހޫމް އިބްރާހީމް ޢަލީ ދީދީ (ތުއްތު ދީދީ) އަށް ސުވަރުގޭގެ ދާއިމީ ނިއުމަތް ލައްވަވައި އެ މަރުހޫމްގެ ޢާއިލީ މެމްބަރުންގެ ކެތްތެރިކަން އިތުރުކުރައްވާށިއެވެ. އާމީން.