ރާއްޖޭގެ ޒުވާން ލަވަ ކިޔުންތެރިޔާ މޫޝަން މުބާރިކް އޭނާގެ އަމިއްލަ ނަމުގައި ދާދި ފަހުން ނެރުނު ސޯލޯ އަލްބަމް "މޫޝަން މުބާރިކް" އައްޑޫގައި ރަސްމީކޮށް ލޯންޗް ކުރަން ނިންމައިފި އެވެ.
މޫޝަންގެ އެކޯސްޓިކް ޕަފޯމަންތަކާ އެކު ބާއްވާ މިއުޒިކް އިވެންޓް އޮންނާނީ މި މަހުގެ 11 ވަނަ ދުވަހުގެ ރޭ ހިތަދޫ ބޮޑުމަގުގައި ހުންނަ ޕާން ޕީނޯޒް ރެސްޓޯރަންޓްގަ އެވެ. އިވެންޓް ފަށާނީ 8:30 ގަ އެވެ.
މި އިވެންޓް ތެރޭގައި މަޝްހޫރު ފޮޓޯގްރާފަރު މިލްޒީރޯ ހިތަދޫގައި ހިންގާ ބޭސިކް ފޮޓޯގްރަފީ ކޯސް ފުރިހަމަ ކުރާ ބައިވެރިންނަށް ސެޓްފިކްޓް ވެސް ދިނުން އޮންނާނެ އެވެ.
އަމިއްލަ ރާގުގެ ހިތްގައިމު އަށް ލަވަ ހިމެނޭ "މޫޝަން މުބާރިކް" އަކީ ކުރިން އާންމުންނަށް ދޫކޮށްލައިފައިވާ ވަރަށް މަގުބޫލް ދެ ލަވައެއް ވެސް ހިމަނައިގެން ނެރެފައިވާ އަލްބަމެކެވެ. އެއީ "ރަންނަމާރި" އާއި ވީޑިއޯ ލަވައެއްގެ ގޮތުގައި ގެނެސް ދިން "ރީތިކަން" އެވެ.
އަލްބަމްގައި ހިމެނޭ ލަވަތަކުގެ ތެރެއިން ދެ ލަވައެއް ވަނީ ބޭރުގެ ޑީޖޭއެއް ކަމަށްވާ އޮސްޓުން ލީޑްސްއާ އެކު ރިމިކްސްކޮށްފަ އެވެ. އެ ދެ ލަވައަކީ "ރީތިކަން" އާއި "އިހުސާސް" އެވެ.
ފޭދު އަށް ނިސްބަތްވާ މޫޝަންގެ އަލްބަމް ޑެޑިކޭޓްކޮށްފައި ވަނީ އޭނާގެ ބައްޕަ މަރުހޫމް އަބްދުﷲ މުބާރިކްއަށެވެ.
ނޮވެމްބަރު މަހުގެ 11 ވަނަ ދުވަހުގެ ރޭ މޫޝަން ޕާން ޕީނޯޒްގައި ޕަފޯމް ކުރާ އިރު، މީގެ ކުރިން ވެސް އޭނާ ވަނީ އައްޑޫގެ ބައެއް ރެސްޓޯރަންޓްތަކުގައި ލައިވް ހުށަހެޅުންތަކެއް ގެނެސް ދީފަ އެވެ.