ސީރިޔާގެ ޖާސޫސީ ޑްރޯންއެއް ގޯލާން ސަރައްދުން އިސްރާއީލް ސިފައިން ވައްޓާލާފައިވާ ކަމަށް އިސްރާއީލުގެ އަސްކަރިއްޔާއިން ހާމަކޮށްފިއެވެ.
މިއަދުގެ ވަގުތެއްގައި ޕެޓްރިއޮޓް އިންޓަސެޕްޓާރ މިސައިލް ބޭނުންކޮށްގެން އިސްރާއީލް ސިފައިން ޑްރޯން ވައްޓާލާފައިވަނީ ގޯލާންގެ ޑީމިލިޓަރައިސްޑް ޒޯން އިން ކަމަށް އަސްކަރިއްޔާއިން މައުލޫމާތުދެއެވެ.
ގޮލާންގެ ޑީމިލިޓަރައިސްޑް ޒޯން އަކީ 1973 ވަނަ އަހަރު ދެގައުމުގެ ދެމެދުގައި ކުރެވުނު ހަނގުރާމައަށްފަހު ހަމަލާ ބަދަލުކުރުން ހުއްޓުމަކަށް ގެނެސް ދެގައުމުގެ ދެމެދުގައި ކަނޑައަޅާފައިވާ ސަރަހައްދެކެވެ.
އިސްރާއީލުގެ އަސްކަރިއްޔާއިން އެންމެ ފުރަތަމަ ތުހުމަތުކޮށްފައިވާގޮތުން ވައްޓާލެވުނު ޑްރޯންއަކީ ރަޝިޔާގައި އުފައްދާފައިވާ ޑްރޯންއެކެވެ. ނަމަވެސް އެވާހަކައަށް ބާރުލިބޭ އެއްވެސް ހެއްކެއް އެފަރާތުން އޭރު ދައްކާފައިނުވެއެވެ. އެހެންކަމުން ފަހުން އިސްރާއީލްގެ އަސްކަރިއްޔާގެ އޮފިޝަލުން ބުނެފައިވަނީ ވައްޓާލެވުނު ޑްރޯންއަކީ ރަޝިޔާގައި އުފައްދާފައިވާ އެއްޗެއްކަން އަދި ސާފުނުވާކަމަށެވެ.
ރަޝިޔާ އިން ވަނީ 2015 ވަނަ ސީރިޔާގެ ދާހިލީ ހަނގުރާމައިގެ ތެރެއަށްވަދެ ސަރުކާރާ ދެކޮޅުފަރާތްތަކަށް ހަމަލާދޭން ފަށާފައެވެ. އަދި ސީރިޔާ އަސްކަރިއްޔާ އާއި އީރާންގެ އިތުރުން ލުބުނާނުގެ ހިޒްބުﷲ ޖަމާއަތާއި ގުޅިގެން ބައްޝާރުލް އަސަދުއާ ދެކޮޅު ހަނގުރާމަވެރިން ބަލިކުރުމަށް ވަރުގަދަ ހަމަލާތަކެއް ރަޝިޔާއިން ދީފައިވެއެވެ. މީގެއިތުރުން ސީރިޔާގެ އަސްކަރިއްޔާ އަށް ހަނގުރާމައަށް ބޭނުންވާ ހަތިޔާރާއި ތަމްރީނު ދިނުމުގައި ރަޝިޔާއިން ވަރަށްބޮޑަށް އެހީތެރިވެފައިވެއެވެ.
ސީރިޔާގެ ދާހިލީ ހަނގުރާމައިން ރަޝިޔާ އަދި އީރާނުގެ މަދަދާއެކު ބައްޝާރަށް ކާމިޔާބުލިބުމުން އީރާނުގެ ތާއިދުއޮތް ހިޒްބުﷲ ޖަމާއަތުގެ ހަނގުރާމަވެރިން ސީރިޔާގައި އަތްގަދަކުރުމަކީ އިސްރާއީލުން ވަރަށް ކަންބޮޑުވާކަމެކެވެ. އެހެެންކަމުން އިސްރާއިލުން ދަނީ ސީރިޔާގައި އީރާން އަދި ހިޒްބުﷲގެ އަސްކަރީ ބޭސްއެއް ހެދުމާ ދެކޮޅަށް ވަރަށްބޮޑަށް ލޮބީކުރަމުންނެވެ.
އިސްރާއީލުން ގޯލާން ސަރަހައްދުން 1200 އަކަ ކިލޯމީޓަރުގެ ސަރަހައްދެއް ސީރިޔާގެ އަތުން ފޭރިގެންފައިވަނީ 1967 ވަނަ އަހަރު ކުރެވުނު ހަދުވަހުގެ ހަނގުރާމައިގައެވެ.