ފަލަސްތީނުގެ ކުރީގެ ރައީސް ޔާސިރު އަރަފާތު އަވަހާރަވިތާ 13 އަހަރު ފާހަނގަ ކުރުމަށް އެތައް ހާސް ބަޔަކު ފަލަސްތީނުގެ ޣައްޒާގައި އެއްވުމެއް ބާއްވައިފިއެވެ.
މިއީ ހަމާސްގެ ބާރުގެ ދަށުގައި އޮންނަ ޣައްޒާގައި 2007 ވަނަ އަހަރުގެ ފަހުން މިފަދަ ގޮަތަކަށް ޔާސިރު އަރަފާތުގެ ހަނދާނުގައި އެއްވުމެއް ބޭއްވި ފުރަތަމަ ފަހަރެވެ.
މިއެއްވުން ބާއްވާފައި މިވަނީ މިދިޔަމަހު ހަމާސް އާއި ވާދަވެރި ފަތަހަ ޖަމާއަތާ ދެމެދު ހިޔާލުތަފާތުވުންތައް ނެތިކޮށްލުމަށް ވެވުނު ތާރީޚީ އެއްބަސްވުމަށްފަހު ފަލަސްތީނުގެ އެއްބައިވަންތަކަން ދެއްކުމަށެވެ.
ފަތަހަ ޖަމާޢަތަކީ ކުރީގެ ރައީސް ޔާސިރު އަރަފާތު އިސްކޮށް ހުންނަވައިގެެން އުފެއްދެވި ޖަމާޢަތެކެވެ. އަދި އެމަނިކްފާނު 2004 ވަނަ އަހަރު އަވަހާރަވުމާ ހަމައަށްވެސް އެޖަމާޢަތުގެ އިސްފަރާތެއްގެ ގޮތުގައި ހުންނެވީ ޔާސިރު އަރަފާތުއެވެ.
މިއެއްވުމުގައި ބައިވެރިވި ފަރާތްތަކުން ވަނީ ފަލަސްތީނުގެ އެއްބައިވަންތަކަމަށް ގޮވާލާ އެތެރޭގެ ސިޔާސީ ހަމަނުޖެހުން އެއްކޮށް ނިމުމަކަށް ގެނައުމަށް ގޮވާލާފައެވެ. އަދި ކުރީގެ ރައީސް ޔާސިރު އަރަފާތާއި މިހާރުގެ ރައީސް މަހްމޫދު އައްބާސްގެ ފޮޓޯ ޕޯސްޓަރުތަކާ އެކު މުޅި ޣައްޒާވަނީ ފަލަސްތީނު ދިދައިން ޖަރީކޮށްފައެވެ.
ޔާސިރު އަރަފާތު 2004 ވަނަ އަހަރުގައި އަވަހާރަވިއިރު އިސްރާއީލުން އެމަނިކްފާނު އަވަހާރަކޮށްލީކަމަށް ގިނަބަޔަކު ތުހުމަތުކުރެއެވެ.