މިމަހު 04 ވީ ހޮނިހިރު ދުވަހަކީ ދުނިޔޭގެ ފަލަ ސުރުޚީގައި ސައުދީގެ ވާހަކަ ގިނަވި ދުވަހެކެވެ. މި ދުވަހު ސައުދީގައި ހިނގި ތަފާތު ތިން ހާދިސާއަކަށް މުޅި ދުނިޔޭގެ ސަމާލުކަން ހުއްޓިގެންދިޔައެވެ.
ފުރަތަމަ ކަމަކަށް ކިންގް ހާލިދް ބިން އަބަދުލް އަޒީޒް އެއާޕޯޓަށް ޔަމަނުގެ ހޫތީން ދޭން މަސައްކަތްކުރި މިސައިލް ހަމަލާއެވެ. ސައުދީ އަސްކަރިއްޔާއިން ވަނީ މިހަމަލާ ނާކާމިޔާބު ކޮށްލާފައެވެ.
ދެވަނަ ކަމަކަށް ލުބުނާނުގެ ބޮޑުވަޒީރު ސާދް އަލް ހަރީރީ ސައުދީގައި ހުންނަވައިގެން މަގާމުން އިސްތިއުފާ ދިނުމެވެ. ސައުދީއަށް ކުއްލި ދަތުރުފުޅެއްގައި ވަޑައިގެން ހަރީރީ ސައުދީގައި މަޤާމުން އިސްތިއުފާ ދިނުމުން ގިނަބައެއްގެ ސަމާލުކަން އެކަމަށް ހުއްޓުނެެވެ. އަދި ބައެއް ފަރާތްތަކުން ތުހުމަތު ކޮށްފައިވަނީ ހަރީރީ މަގާމުން އިސްތިއުފާ ދީފައިވަނީ ސައުދީއިން މަޖުބޫރު ކުރުވައިގެންކަމަށެވެ.
ތިންވަނަ ކަމަކަށް ސައުދީއިން ފެއްޓެވި ކޮރަޕްޝަނާ ދެކޮޅު ހަރަކާތެވެ. މި ހަރަކާތުގައި އެތައް ބަޔަކުވަނީ ހައްޔަރުކުރެވިފައެވެ. އޭގެތެރޭގައި ޕްރިންސުންނާއި ސައުދީ މިނިސްޓަރުންނާއި މަޝްހޫރު ވިޔަފާރިވެރިން ހިމެނެއެވެ.
މިދެންނެވި ހުރިހާ ކަމެއްގެ މުގުލުގައި ސީދާގޮތުންނާ ނުސީދާގޮތުން ގުޅިފައިވަނީ އެންމެ ފަރާތަކާކަމަށް ގިނަބަޔަކު ދަނީ ބުނަމުންނެވެ. އެފަރާތަކީ މިހާރުގެ ސައުދީ ވަލީ އަހުދު މުހައްމަދު ބިން ސަލްމާން އެވެ. އަރަބި ގަލްފް ސަރަހައްދު ހަލަބޮލި ވެފައިމިވަނީ ރަސްގެފާނު ސަލްމާން ބިން އަބްދުލް އަޒީޒް ވެރިކަމަށް އައިސް ވަލީއަހުދުގެ މަގާމަށް އެމަނިކްފާނުގެ ދަރިކަލުން މުހައްމަދު ބިން ސަލްމާން އައްޔަންކުރެއްވި ހިސާބުންކަމަށް ގިނަފަރާތްތަކުންދެކެވެ.
އަދި މިހުރިހާ ކަމެއް ގުޅިފައިވަނީ ވަލީއަހުދު މުހައްމަދު ބިން ސަލްމާން ރަސްކަމަށް އައުމަށް ކުރަންޖެހޭ ކަންކަމުގެ ތެރޭގައި ކަމަށް މަސްރަހު ދިރާސާކުރާ ފަރާތްތަކުން ދެކެއެވެ.
ސައުދީ ޝާހީ އާއިލާގެ ތިންވަނަ ޖީލުގެ ޕްރިންސަކު ދައުލަތުގެ އެންމެހައި ބާރުތައް މިހާރު ކޮންޓްރޯލް ކުރަމުންދާއިރު، ސައުދީ މުޖުތަމައު ޒަމާނުއްސުރެ އުޅެމުން އައިގޮތަށް ބޮޑެތި ބަދަލުތަކެއް ގެނައުމަށް ވަލީއަހުދު ދަނީ މަސައްކަތް ކުރަމުންނެވެ. މިގޮތުން އަންހެނުންގެ ބައިވެރިވުން މުޖްތަމައުގައި އިތުރުކޮށް މިއުޒިކާއި، ސިނަމާތައް އާންމުކޮށް ތަފާތު އެހެންވެސް ހުޅަނގުގެ ފިކުރުތައް އާންމުކުރުމަށް ބޮޑެތި ކެމްޕެއިންތަކެއް ސައުދީ ސަރުކާރުންވަނީ ފަށާފައެވެ.
މީގެއިތުރުން ކުރީގެ ވަލީއަހުދު މުހައްމަދު ބިން ނާއިފް އާއި މިހާރުގެ ވަލީއަހުދު މުހައްމަދު ބިން ސަލްމާން އާ ދެމެދު ބޮޑެތި ކޯޅުންތަކެއް އުފެދި ޝާހީ އާއިލާތެރޭގައި މިވަނީ ހަލަ ބޮލިކަން އިތުރުވެފައެވެ. މިހާރުގެ ވަލީއަހުދު މުހައްމަދު ސަލްމާނު ފަދައިން ކުރީގެ ވަލީއަހުދު މުހައްމަދު ބިން ނާއިފް މަގާމާއި ހަވާލުވެގެން ވެސް ސައުދީގެ އެންމެ ނުފޫޒުގަދަ އެއްފަރާތުގެ ގޮތުގައި ފާހަގަވެގެން ދިޔައެވެ. ނަމަވެސް އެބާރުތައް ނެތިގެންދިޔައީ މަގާމުން ވަކިކުރުމަށްފަހު މުހައްމަދު ބިން ސަލްމާން އެމަގާމަށް އައްޔަންކުރުމުންނެވެ.
އެހެންކަމުން މުހައްމަދު ބިން ސަލްމާން އަށް މަޖުބޫރުވެފައިވަނީ ކުރީގެ ވަލީއަހުދު ބިން ނާއިފްގެ ހުރިހާ ބާރުތައް ނެތިކޮށްލުމަށެވެ. އެހެންކަމުން ޝާހީ އާއިލާތެރޭގައި ބިން ނާއިފްއަށް މަދަދު ވެދާނެ އެންމެެން ކޮންމެވެސް މަޅިއެއްްގައި ޖެއްސުމަށް މުހައްމަދު ބިން ސަލްމާން މަސައްކަތްކުރަމުންދާކަމަށް ގިނަ ފަރާތްތަކަކުންދަނީ ބުނަމުންެނެވެ. އަދި މިހާރު ކޮރަޕްޝަނާ ދެކޮޅަށް ކަމަށް ބުނެ ހައްޔަރުކޮށްފައިވާ ސައުދީ ޝާހީ އާއިލާއަށް ނިސްބަތްވާ ފަރާތްތަކާއި އެހެނިހެންވެސް ވިޔަފާރިވެރިންނަކީ ބިން ނާއިފްއަށް ތާއިދުކުރާ ފަރާތްތަކެއްގެ ގޮތުގައި މިވަނީ ބެލެވިފައެވެ.
ޝާހީ އާއިލާގެ އެތައް ޕްރިންސަކު ސައުދީގައި ހައްޔަރުކޮށްފައިވާއިރު ދާދި އަވަހަށް ރަސްކަމުގެ އެންމެހައި ބާރުތައް ސަލްމާން ރަސްގެފާނުގެ މުހައްމަދު ބިން ސަލްމާން އާ ހަވާލުކުރުމަށް ތައްޔާރުވަމުން އަންނަކަމުގެ އަޑުމިވަނީ އަރާފައެވެ. މުހައްމަދު ބިން ސަލްމާން މިހާރު ކުރަމުންދާ މަސައްކަތްތަކަކީ ރަސްކަމާ ހަވާލުވުމުގެ ކުރިން ޝާހީ އާއިލާ ތެރެއިން ކުރިމަތިވެދާނެ އެންމެހައި ނުރައްކާތައް ނެތިކޮށްލުން ކަމަށް ގިނަ ފަރާތްތަކުން ދަނީ ބުނަމުންނެވެ.
އަދި މިކަމަށް އިސްރާއީލުގެ އިތުރުން އެމެރިކާގެ ފުރިހަމަ ތާއިދު އޮތްކަން އެފަރާތްތަކުން ވަނީ ހާމަކޮށްފައެވެ. އަދި މުހައްމަދު ބިން ސަލްމާން ރަސްކަމަށް ގެނައުމަށް މަސައްކަތް ކުރަމުން ދާއިރު، މިހާރު އެމެރިކާގެ ނުފޫޒު މެދުއިރުމަތީގައި އިންތިހާއަށް ވަނީ ކުޑަވެފައެވެ. އެހެންކަމުން އެމެރިކާ އަދި އިސްރާއީލު އަޑީގައި އޮވެގެން އަރަބި އިސްލާމީ ދުނިޔޭގައި އެފަރާތްތަކުން ބޭނުންވާ ކަންކަން ހާސިލުކޮށްދިނުމުގައި މަދަދުވާނެ ފަރާތެއްގެ ގޮތުގައި މުހައްމަދު ބިން ސަލްމާން ވާނެއެވެ.
މިދުވަސްކޮޅު ޔަމަން، އިރާޤް، ސީރިޔާ އަދި ލުބުނާނުގައި ހިގަމުންދާ ހަރަކާތްތަކަކި އެއްފަރާތުން ސައުދީ އަދި އަނެއްފަރާތުން އީރާނުގެ ކުރިމަތިލުމެއްގެ ގޮތުގައި މެދުއިރުމަތީގެ މަސްރަހު ދިރާސާކުރައްވާ ފަރާތްތަކުން ދަނީ ފާހަގަކުރަމުންނެވެ.
މިހާރުގެ ހާލަތުގައި އަރަބި އިސްލާމީ ދުނިޔޭގައި އީރާނުގެ ނުފޫޒު މިވަނީ އިންތިހާއަށް ބޮޑުވެފައެވެ. މިގޮތުން އިރާޤް ސީރިޔާ އަދި ޔަމަނުގެ ހޫތީ ޖަމާޢަތް އަދި ލުބުނާނުގެ ހިޒްބުއްﷲ ޖަމާޢަތަކީ އީރާނުގެ ސީދާ މަދަދު ލިބޭ ޝީޢީ މަޒުހަބުގެ ބައިވެރިންނެވެ.
އެހެންކަމުން އެގައުމުތަކުގައި އީރާނުގެ ނުފޫޒު އިތުރުވެގެން ދާދިއުމަކީ އިސްރާއީލާއި އެމެރިކާއަށް ކުރިމަތިވެފައިވާ ބިރަކަށްވާތީވެ، ސައުދީ ކުރިމައްޗަށްނެރެ އީރާނާ ދެކޮޅަށް ތަފާތު ހަރަކާތްތައް ހިންގަމުންދާކަމަށް އިރާނުން ތުހުމަތުކުރެއެވެ. އަދި މިފަދަ ހަރަކާތްތައް ހިންގުމުގައި މިހާރުގެ ވަލީއަހުދު މުހައްމަދު ބިން ސަލްމާން އެމެރިކާ އާއި އިސްރާއީލަށް މަދަދުވަމުން އަންނައިރު އެގައުމުތަކުން މުހައްމަދު ބިން ސަލްމާން ރަސްކަމަށް އައުމަށް ފުރިހަމައަށް ތާއިދުކޮށް އެހީތެރިވަމުން އަންނަކަމަށް ބެލެވެއެެވެ.