ކުޅުދުއްފުށީގެ ތަރައްޤީގެ ތަސައްވުރެއް އެމްޑީޕީގައި އެބަ އޮތް ކަމަށާއި އެ ރަށަކީ ރާއްޖޭގެ އުތުރުގެ އެންމެ ބޮޑު އާބާދީއަށް ވެފައި، ޕާޓީގެ ތަރައްޤީގެ ޕްލޭންގައި ކުޅުދުއްފުށްޓަކީ ރާއްޖޭގެ އުތުރުގެ އިޤްޠުޞާދީ ނާރެސް ކަމަށް އެމްޑީޕީން ބުނެފި އެވެ.
އެ ޕާޓީން ނެރުނު ބަޔާނެއްގައި ބުނީ،ކުޅުދުއްފުށީގެ ދަތުރުފަތުރުގެ ވަސީލަތް ތަރައްޤީ ކުރުމަކީ ކުޅުދުއްފުށްޓަށް އެމްޑިޕީން އެކުލަވާލާނޭ ތަރައްޤީގެ ޕްލޭންގެ މައިގަނޑު އެއް ބައި ކަަމަށެވެ.
"މި ޕާޓީގެ އެތަސައްވުރު ކުޅުދުއްފުށީގެ ތަރައްޤީގެ ޕްލޭންގެ ގޮތުގައި ކުރެހިގެން ދާނީ ކުޅުއްދުއްފުށީ ރައްޔިތުންގެ އާނ ބަހާ އެކުގައި ކަމުގެ ޔަޤީންކަން އަރުވަމެވެ. ކުޅުދުއްފުށީގެ ރައްޔިތުންގެ ވައިގެ ގުޅުން ޤާއިމުކޮށް ދޭނީ ކުޅުދުއްފުށީ ރައްޔިތުން އެދޭ ގޮތަށް ކަމުގައި ދަންނަވަމެވެ." ބަޔާނުގައި ބުންޏެވެ.
އެ ބަޔާނުގައި ބުނެފައި ވަނީ ރައީސް އަބްދުﷲ ޔާމީންގެ ސަރުކާރުން ކުޅުދުއްފުށީގައި އެއާޕޯޓް އަޅާނެ ކަމަށް ބުނެ ދައްކަނީ ދަޅައެއް ކަމަށާއި ކުޅުދުއްފުށީގައި ޔާމީންގެ ސަރުކާރުން އެއަޕޯޓެއް ނާޅާނެ ކަމަށެވެ.
"ރައީސް ޔާމީންގެ ސަރުކާރުގެ ފުރަތަމަ ދެ އަހަރު ދުވަހުގެ ތެރޭގައި ކުޅުދުއްފުށީގައި އެއާޕޯޓެއް އަޅާނެ ކަމަށް 2013 ގެ އިންތިޚާބުގެ ކެމްޕޭންގެ ތެރޭގައި ރައީސް ޔާމީން ވައުދުވެފައިވީ ނަމަވެސް، ރައީސް ޔާމީންގެ ސަރުކާރުގެ ހަތަރު އަހަރު ފާއިތުވެގެންދާ އިރު އެކަން ނުކުރައްވާ ހުންނެވިކަން ފާހަގަ ކުރަމެވެ." ބަޔާނުގައި ބުންޏެވެ. "ރައީސް ޔާމީންގެ ސަރުކާރުގެ މަޤްޞަދަކީ، 2018 ވަނަ އަހަރުގެ ރިޔާސީ އިންތިޚާބާ ދިމާކޮށް ކުޅުދުއްފުށީގައި އެއާޕޯޓެއް އެޅުމުގެ މަންޒަރު ކުޅުދުއްފުށީ ރައްޔިތުންނަށް ދައްކައި، ކުޅުދުއްފުށީ ރައްޔިތުންގެ ލޮލުގައި އަނެއްކާވެސް އަނދުނެއް އެޅުވުމެވެ."
އެމްޑީޕީގެ ބަޔާނުގައި ބުނީ ރައީސް ޔާމީންގެ ސަރުކާރުން ދިވެހި ރައްޔިތުންނަށް ބޮޑެތި އޮޅުވާލުންތައް އޮޅުވާލަމުންދާތީ އިންތިހާ އަށް ކަންބޮޑުވާ ކަމަށެވެ.
ކުޅުދުއްފުށީގައި އެއާޕޯޓެއް ނާޅާނެ ކަމަށް އެމްޑީޕީން ބުނި ނަމަވެސް، އެ ރަށު އެއާޕޯޓް އަޅާ ބިން ހިއްކަން ފެށުން އިއްޔެ ރަސްމީކޮށް އިފުތިތާހުކޮށް، އަންނަ އަހަރުގެ އޮގަސްޓް މަހު އެ ރަށު އެއާޕޯޓަށް ފްލައިޓް ޖައްސާނެ ކަމުގެ ޔަގީންކަން ސަރުކާރުން ވަނީ ދީފަ އެވެ.