2011 ވަނަ އަހަރުގެ ޖުލައި މަހުގެ 23 ވަނަ ދުވަހެވެ. އަޅުގަނޑުވެސް ތަޢުލީމު ޙާސިލު ކުރުމަށްޓަކައި ކޮޅަނބުގައި ހުރެފައި ޗުއްޓީ ދުވަސްވަރު ކަމަށް ވާތީ އައްޑޫސިޓީ ގައި ހުރީމެވެ. އެދުވަސްވަރު ރަށުތެރޭގެ ކުނީގެ މައްސަލަ އިންތިހާއަށް ބޮޑުވެ، އޭގެ ނުބައި އަސަރު ރަށުގެ ތިމާވެއްޓަށް ކުރަމުން ދިޔަ އެވެ. އެހެން ކަމުން އެ މައްސަލަ ޙައްލު ކުރުމަށް އައްޑޫ ހައި ސްކޫލާއި ސިޓީ ކައުންސިލް ގުޅިގެން ރަށުގެ ގޮނޑުދޮށް ސާފުކުރުމުގެ ޙަރަކާތެއް ކުރިއަށް ގެންދެވުނެވެ.
ދުވަސްވަރަކީ ކައުންސިލް ވެސް ޅަ ދުވަސްވަރެވެ. އެހެންކަމުން އެބޭފުޅުންގެ ފަރާތުންވެސް ހީވާގިކަމާއި މުރާލިކަން ފެނިގެން ދިޔަ އެވެ. ކަންކަމުގައި އިސްނެގުމާއި ކަންކަން ކުރުމުގައި އެބޭފުޅުންގެ ވެސް ޝައުގުވެރިކަން ހުއްޓެވެ. ސާފުކުރުމުގެ ޕްރޮޖެކްޓުތަކާއި، ކުޅިވަރު މުބާރާތްތައް އިންތިޒާމް ކުރުމާއި އަދިވެސް ތަފާތު ޢިޖުތިމާއީ މަސައްކަތްތަކުގައި އެބޭފުޅުންގެ އިސްނެންގެވުން އިންތިހާއަށް އޮތެވެ.
ކޮންމެއަކަސް އައްޑޫ ހައި ސްކޫލުގެ ކުދީން ހިންގި ސާފު ކުރުމުގެ ހަރަކާތުގައި ބައިވެރި ވުމަށް އަޅުގަނޑަށް ވެސް ދަޢުވަތު ލިބުނެވެ. ޢިޖްތިމާއީ ޚިދުމަތެއް ކޮށްދިނުމުގެ މަތިވެރި ނިޔަތުގައި އަޅުގަނޑުވެސް އެކަމުގައި ބައިވެރިވީމެވެ. ސާފުކުރަން ހަމަޖެހިފައި އޮތީ އާއްމުކޮށް އެންމެންވެސް މިހާރު ޕިކްނިކަށް ދާ ހަންކެޑެ ސަރަހައްދެވެ.
ހުރިހާ ކުދީންވެސް ހައި ސްކޫލުން ނައްޓާލީ އެސަރަހައްދަށެވެ. ހުރިހާ އެންމެނަށްވެސް ހީވެފައި އޮތީ އެދުވަހުގެ ސާފުކުރުމުގެ ހަރަކާތް އޭގެ ކުރީގެ ޙަރަކާތްތަކާއި ޚިލާފް ވާނެ ކަމަށެވެ. އެއީ އެދުވަހު ހަމަޖެހިފައި އޮތީ ހަމައެކަނި ތަން ސާފުކޮށްލުމަށްފަހު ނިންމާލާކަށެއް ނޫނެވެ. އެއްބަސްވެވިފައި އޮތީ ކައުންސިލުން އެސަރަހައްދުގެ ކުނީގެ މައްސަލަ އަށް ދާއިމީ ޙައްލެއް ހޯދުމަށްޓަކައި އެ ސަރަޙައްދުގައި ޑަސްބިންތައް ބަހައްޓާށެވެ.
ކޮންމެއަކަސް ހުރިހާ ކުދީން މުޅި ސަރަޙައްދު ސާފުކޮށް ނިންމާލައިފިއެވެ. ކުޑައިރުކޮޅެއް ފަހުން އައްޑޫސިޓީގެ މޭޔަރ ޢަބްދުﷲ ސޯދިގާއި އެއިރުގެ ސްޓޭޓް މިނިސްޓަރެއް ކަމަށްވާ ޙުސެން ޝާހިދު އެސަރަހައްދަށް ވަޑައިގަތެވެ. ކުދީންނާއި ސަލާމްކޮށްލެއްވުމަށް ފަހު ކައުންސިލް އޮފީހުން ބޮޑު ޑަސްބިންތައް ޕިކަޕެއްގައި އެބައަންނަ ކަމަށް ވިދާޅުވެފައި ދެ ބޭފުޅުންވެސް ކާރުކޮޅުގައި ވަޑައިގެންފިއެވެ. އެއިރު ގަޑިން ގާތްގަނޑަކަށް 3 ޖެހީ އެވެ. ޑަސްބިން ތަކުގެ އިންތިޒާރުގައި ކުދީން އިރު އޮއްސި 6 ޖެހިއިރުވެސް ތިބީއެވެ. ޑަސްބިން ޕިކަޕެއް ނައެވެ. އޭގެފަހުން ދެ އަހަރު ފާއިތުވި އިރުވެސް އެ ޕިކަޕު ހަންކެޑެ އަކަށް ނުފޯރަ އެވެ.
އެ ދުވަހު ފަހަރެއްގައި ކައުންސިލުގައި ޑަސްބިން ނެތިގެން އެވާހަކަ ބުނަން ލަދުން މޭޔަރ އިތުރުފުޅެއް ހެއްދެވީ ކަމަށް ވެދާނެއެވެ.
ކޮންމެއަކަސް އެއީ މި ވާހަކައިގެ ފެށުމެވެ. އޭގެ ފަހުން މިއަދާއި ހަމައަށް ސިލިންކޯ އިންޝުއަރެންސް ކޮމްޕެނީ އާއި މޯލްޑިވިއަން ރެޑް ކްރެސެންޓުންވެސް ވަނީ ކައުންސިލަށް ޑަސްބިން ހަދިޔާކުރަން ތައްޔާރުކަމަށް ބުނެފައެވެ. ނަމަވެސް ކައުންސިލުން އެކަމަށް މާ ބޮޑު ޝައުގުވެރިކަމެއް ފާޅުނުކުރުމުގެ ސަބަބުން އެ ޑަސްބިންތައް ލިބިފައި ނުވާކަމީ ހިތާމަ ހުރިކަމެކެވެ.
މިދިޔަ އަހަރު ފަހުކޮޅު އައްޑޫގެ ތަރައްގީއަށް މާ ބޮޑަށް މަސައްކަތް ކުރާ ބޭފުޅުންތަކަކާއި އެކު ދެކެވުނު ވާހަތަކުގައި ހައިސްކޫލުން ހިންގި ސާފުކުރުމުގެ ޕްރޮޖެކްޓުގެ ވާހަކަ ދެކެވުނެވެ. އެވާހަކަ އަޑު އިވިފައި އެތާ އިންނެވި މޭޔަރާއި ވަރަށް އަރިސް އައްޑޫގެ އިޖްތިމާއީ ތަރައްގީގައި ވަރަށް އިސްކޮށް އުޅުއްވާ، މީގެ ކުރީން ޖަމްޢިއްޔާއެއް ހިންގެވި ބޭފުޅެއް ވަރަށް ހައިރާވެފައި އަހާލިއެވެ، " މޭޔަރ ގާތުގައި އެކަމަށް އެދުނިން ތޯ ހަމަ ހަގީގަތުގައިވެސް ؟ މޭޔަރަށް ހަނދާންކޮށް ދިންތޯ ތިކަން ؟ ". އަޅުގަނޑަށް އެވަގުތު ހިނއަންނަ ކަހަލަ ގޮތެއް ވިއެވެ. ކޮންމެއަކަސް އެކަން މޭޔަރަށް ކުރެވޭނެ ކަން އަޅުގަނޑުމެންނަށް ދެއްކުމުގެ ނިޔަތުގައި އެބޭފުޅާ މޭޔަރާއި ގުޅުއްވި އެވެ. އަދި ޑަސްބިން ބަހައްޓަން ޕްރޮޖެކްޓެއް ހިންގުމަށް އެދުނެވެ. ހަމަ އެ ހަފްތާތެރޭ އެކަން ކުރުމަށް މޭޔަރު ތައްޔާރުކަމަށް ވިދާޅުވި އެވެ. އެއްކަލަ ޑަސްބިންޕިކަޕަށް ވީހެން ހަމަ އެ ހަފްތާއަށްވެސް ވެއްޖެ އެވެ.
މިފަހަކަށް އައިސް އެކަމާއި ބެހޭގޮތުން ކައުންސިލާއި ސުވާލު ކޮށްފި ނަމަ އެބޭފުޅުން ވިދާޅު ވަނީ ޑަސްބިނަކީ ހައްލު ނޫން ކަމަށެވެ. މީހުން އެ ޑަސްބިންތައް ހަލާކު ކުރާނެ ކަމަށެވެ. މީގެ ދެރަކަމަކީ އެބޭފުޅުން ޑަސްބިނަކީ ހައްލެއް ނޫނޭ ވިދާޅުވާއިރު ޙައްލެއް ނުދައްކަވާ ކަމެވެ.
ދެން މީގެ ހަފްތާއެއް ކުރީން އަޅުގަނޑަށް ހުޅުމީދޫއަށް ދެވުނެވެ. ފޭބިތަނާހެން ލޮލުގައި އަޅައިގަތީ މީދޫ މަގުތަކުގެ އެއްފަރާތުގައި ބަހައްޓާފައި ހުރި ޑަސްބިންތަކެވެ. އެރަށުގެ އަމިއްލަ ޖަމްޢިއްޔާއަކުން އިސްނަންގަވައިގެން ބަހައްޓާފައިހުރި އެ އެއްޗިހި ހުރީ ރީއްޗައް ހަދާފައި ހުރި އެއްޗެއްގައި ހަރުކޮށްފައެވެ. ޑަސްބިންތައް ހުންނަތާ އަހަރަކަށްވުރެ ގިނަ ދުވަސް ވެދާނެ ކަމަށް އެރަށު މީހުން ބުނެ އެވެ. މީދޫހުރި ޑަސްބިންތައް ބަޔަކު ހަލާކު ނުކުރަންޏާ ހިތަދޫއާއި ހިތަދޫ ގުޅިފައިވާ ރަށްތަކުގައި ބަހަށްޓާ ޑަސްބިން ބަޔަކު ހަލާކު ކުރަންވީ ސަބަބެއް ނެތެވެ. އެހެންކަމުން ކައުންސިލުން މިހާރު އެ ދައްކާ ސަބަބަކީވެސް ގަބޫލުކުރެވޭވަރުގެ ސަބަބެއް ނޫނެވެ.
ކޮންމެއަކަސް ދަންނަވަންއޮތީ ޑަސްބިން ބެހެއްޓުންފަދަ ކަންކަން ނުކުރެވި މިރަށްތަކުގެ ކުނީގެ މައްސަލަ ހައްލެއް ނުކުރެވޭނެ އެވެ. އަދި ޓުއަރިޒަމް ތަޢާރަފްކުރަން އުޅޭއިރު ރަށުގެ ގޮނޑުދޮށްތައް ކުނިން ފުރިފައި އޮންނަ މަންޒަރަކީ އިންވެސްޓަރުން ބަލަން ބޭނުންވާނެ މަންޒަރަކަށް ނުވާނެއެވެ. އެހެންކަމުން ކައުންސިލުން ތަންކޮޅެއްބޮޑަށް ހީވާގި ވާން އެބަޖެހެއެވެ. ޑަސްބިން އަރުވާފައި ހުރި ޕިކަޕް ދުއްވަން ކުރިއަށް ދުއްވަން އެނގޭ ޑްރައިވަރަކު ލާން އެބަޖެހެއެވެ. ހަމަ އެގޮތަށް "ކައުންސިލް ޕިކަޕް" ދުއްވަންވެސް ކުރިއަށް ދުއްވަން އެނގޭ ޑްރައިވަރަކު ހޯދަން ރައްޔިތުން ވިސްނަން އެބަޖެހެއެވެ.