މަރަދޫ ބޮޑޮގޭގައި މިހާރު ކާމިޔާބު ޝޯތަކެއް ދައްކަމުން އަންނަ ފިލްމް "ބޮސް" ގެ ޝޯއެއް ހިތަދޫގައި ވެސް އަޅުވަން ނިންމައިފި އެވެ.
ފާތުމަތު ނަހުލާގެ ކްރިސްޓަލް އެންޓަޓައިންމަންޓުން އުފައްދާފައިވާ ފިލްމް އައްޑޫގައި އަޅުވަން ހަވާލުވި ޓީމްގެ އޮފިޝަލަކު މިއަދު ބުނީ ހިތަދޫގައި "ބޮސް" އަޅުވަން ހަމަޖެހިފައި ވަނީ މި މަހުގެ 22 ވަނަ ދުވަހުގެ ރޭ އެ އަވަށު އިވްރީވަންސް ލާނިން ސެންޓަރު (އީއެލްސީ) ގައި ކަމަށެވެ.
ޓިކެޓް ނޯޓް ކުރަން މިހާރު ފުރުސަތު ހުޅުވާލާފައިވާ އިރު، ގުޅަން ޖެހޭ ނަމްބަރުތަކަކީ 7845584 އަދި 7414404 އެވެ.
ހިތަދޫގައި ޝޯއެއް އަޅުވަން ނިންމީ 20 ވަނަ ދުވަހުގެ ރޭ ބޮޑޮގޭގައި ޝޯ އަޅުވަން އެތަން ލިބޭ ގޮތް ނުވުމުންނެވެ. އެހެން އިވެންޓަކަށް ބޮޑޮގޭ ހުސްކުރަން ޖެހުމުން މަރަދޫގައި ދައްކާ ފަހު ޝޯ އޮންނާނީ މި ރެ އެވެ. "ބޮސް" އައްޑޫގައި ދައްކަން ފެށީ މި މަހުގެ 16 ވަނަ ދުވަހުގެ ރެ އެވެ.
"ފިލްމް ބަލަން އަދިވެސް ގިނަ ބަޔަކު ޑިމާންޑް ކުރާތީއާ އެކު ހިތަދޫގައި ޝޯއެއް ދައްކަން ނިންމީ،" އޮފިޝަލް ބުންޏެވެ. "އެހެންވެ މަރަދޫގައި ފިލްމް ބަލާލަން ފުރުސަތު ނުލިބުނު މީހުންނަށް ނުވަތަ ރިޕީޓްކޮށް ބަލަން ވެސް ބޭނުންވާ މީހުންނަށް މިހާރު މިއޮތީ ހިތަދޫ ޝޯއާ އެކު އިތުރު ފުރުސަތެއް."
އައިޝަތު ރިޝްމީ ޑައިރެކްޓްކޮށްފައިވާ މި ފިލްމްގައި ލީޑް ރޯލް ކުޅެފައި ވަނީ ރިޝްމީގެ ކޮއްކޮ މަރިޔަމް އައްޒައާ އެކު، އަލަށް ތައާރަފުވާ މުހައްމަދު ޔުނާން އެވެ.
ފިލްމްގެ އިތުރު ކާސްޓުންގެ ތެރޭގައި ފާތުމަތު އާޒިފާ (އަޒޫ)، އަލީ އާޒިމް (ދޮންއައްޔަ)، އިބްރާހީމް ޖިހާދު (ޖިމީ) އަދި އަލީ ޝަމީލް ހިމެނެ އެވެ.