މަޝްހޫރު ޑައިރެކްޓަރު އަދި ޕްރޮޑިއުސަރު، އަބްދުލް ފައްތާހު ކުއްލި ގޮތަކަށް ފިލްމީ ދާއިރާއިން މުޅިން ދުރަށް ޖެހިލައިފި އެވެ.
ފިލްމީ ދާއިރާއިން ނުފެންނާނެ ކަމަށް ފައްތާހު އިއުލާން ކޮށްފައިވަނީ ރޭ އޭނާގެ ފޭސްބުކް މެދުވެރިކޮށް ކުރި ޕޯސްޓެއްގައެވެ. ފިލްމީ ކެރިއަރު ނިންމާލާފައިވާކަން ފައްތާހު އިއުލާން ކުރި ނަމަވެސް އޭގެ ފަހަތުގައި ވާ ސަބަބެއް އިއުލާންކޮށްފައެއް ނުވެއެވެ.
އަދި މިވަގުތު މީޑިޔާއާ މިކަމާ ގުޅިގެން އެއްވެސް ވާހަކައެއް ދައްކަން ބޭނުންނުވާ ކަމަށްވެސް ފައްތާހު ބުނެފައިވެއެވެ. ކުއްލި ގޮތަކަށް އޭނާ ފިލްމީ ދާއިރާއަށް އަލްވަދާއު ކިޔާފައިވަނީ ރާއްޖޭގެ ރަނިކަންކުރި ރެހެނދި ޚަދީޖާގެ ހަޔާތާ ގުޅޭ ވާހަކައަށް ފިލްމެއް ހަދާނެ ކަން ކުރިން އިއުލާން ކޮށްފައިވަނިކޮށެވެ.
ރައީސް ނާސިރުގެ ވެރިކަމުގައި ތިނަދޫއަށް އަރައި ހިންގި ލާއިންސާނީ އަމަލުތައް ދައްކުވައިދޭ ފިލްމެއްގެ މަސައްކަތްވެސް ފައްތާހު ވަނީ ފަށާފައެވެ. ނަމަވެސް ސަރުކާރުގެ ނުފޫޒާ ހެދި އޭނާއަށް އެފިލްމުގެ މަސައްކަތް ނިންމާނުލެވުނެވެ.
ފައްތާހުގެ ފިލްމީ ކެރިއަރު ކުއްލި ގޮތަކަށް ނިންމާލާފައިވާއިރު މިހާތަނަށް އޭނާ ވަނީ 12 ފީޗާ ފިލްމު ޑައިރެކްޓުކޮށްފައެވެ. އެންމެ ފަހަކަށް ފައްތާހުގެ ފިލްމަކަށް އާންމުންނާ ހަމައަށް އައިސްފައިވަނީ މިއަހަރު ނެރުނު "ހައްދު" ފިލްމެވެ. ބެލުންތެރިންގެ ވަރަށް ބޮޑު މަގުބޫލުކަމެއް މިފިލްމަށް ލިބިގެން ގޮސްފައިވެއެވެ.