އަސަރު ގަދަ ލޯބީގެ ފިލްމް "ބޮސް" ގެ ކާމިޔާބު ޝޯތަކެއް މަރަދޫގައި ދެއްކުމަށް ފަހު، އެ ފިލްމްގެ އައްޑޫ ފަހު ޝޯ މިރޭ ހިތަދޫގައި ދައްކާނެ އެވެ.
ހިތަދޫގައި ފިލްމް އަޅުވަން ހަމަޖެހިފައި ވަނީ އިވްރީވަންސް ލާނިން ސެންޓަރު (އީއެލްސީ) ގަ އެވެ. ފިލްމް އަޅުވާ ޓީމުން ބުނީ ފިލްމްގެ ޓިކެޓް ހޯދަން ބޭނުންވާ މީހުން 7845584 އަދި 7414404 އަށް ގުޅުމުން ޓިކެޓް ކަންތައް ހަމަޖެހޭނެ ކަމަށެވެ.
މަަރަދޫ ބޮޑޮގޭގައި "ބޮސް" ގެ ހަތަރު ޝޯ މި މިމަހުގެ 16-19 އަށް ވަނީ ދައްކައިފަ އެވެ. މިއީ މިހާތަނަށް އައްޑޫގައި އެންމެ ގިނަ ޝޯ ދެއްކި ފިލްމެވެ.
ފާތުމަތު ނަހުލާގެ ކްރިސްޓަލް އެންޓަޓައިންމަންޓުން އުފައްދާފައިވާ "ބޮސް" އަކީ އޭނާގެ ސްކްރީންޕްލޭއަކަށް އައިޝަތު ރިޝްމީ ޑައިރެކްޓްކޮށްފައިވާ ފިލްމެކެވެ.
ފިލްމްގައި ލީޑް ރޯލް ކުޅެފައި ވަނީ މަރިޔަމް އައްޒައާ އެކު، އަލަށް ތައާރަފުވި މުހައްމަދު ޔުނާން އެވެ. އަދި ފިލްމްގެ އިތުރު ކާސްޓުންގެ ތެރޭގައި ފާތުމަތު އާޒިފާ (އަޒޫ)، އަލީ އާޒިމް (ދޮންއައްޔަ)، އިބްރާހީމް ޖިހާދު (ޖިމީ) އަދި އަލީ ޝަމީލް ހިމެނެ އެވެ.