އިންސާނާގެ ދިރިއުޅުމުގެ ކޮންމެ ހިނދުކޮޅަކީ އަދި ކޮންމެ ނޭވާ އަކީ އަގުބޮޑު ޖަވާހިރެއް ފަދަ އެއްޗެކެވެ.
އެތެރެއަށް ލާ ކޮންމެ ނޭވާ އަކީ ދިރިހުރުމަށްޓަކައި އެތުރޭ މުތީގެ ހާރެއް ފަދަ އެއްޗެއްކަން ކަށަވަރެވެ. ދުނިޔޭގެ އެންމެ ނިކަމެތި މީހާ އިން ފެށިގެން އެންމެ މުއްސަނދި މީހާ އާ ހަމައަށް އެންމެންގެ ވެސް އޮތް އެންމެ އަގުބޮޑު އެއްޗަކަށް ވަނީ އެ މީހާގެ ދިރުމެވެ.
މި ދިރުމަކީ އިންސާނާގެ އަމިއްލަ ހައްގެއް ކަމަށް ދެކޭ މީހުން ދަނީ އެއް ދުވަހުން އަނެއް ދުވަހަށް ގިނަވަމުން ނެވެ. މީގެ އެއް ހެއްކަކީ އަމިއްލ ައަށް ދަންޖެހި މަރުވާ މީހުން ދުނިޔޭގެ އެކި ހިސާބުތަކުގައި ގިނަވަމުންދާ ދިޔުމެވެ. ހިތާމައަަކީ އަޅުގަނޑުމެންގެ މި ކުޑަކުޑަަ މުޖުތައުގައި ވެސް މިކަން އާދައަކަަށް ވަމުންދާކަމެވެ.
އެއްވެސް ޝައްކެއް ނެތް ގޮތުގައި މިފަދަ ކަންކަމަށް ދެވޭ ގޮތް ވަނީ އިންސާނާގެ އީމާންތެރިކަމެއް އަމުދުން ނެތިގެން ދިޔުމުންނެވެ.
ކުޑަ ކުޑަ ލޭ ތިއްކަކުން އިންސާނާ އުފެއްދެވި ގަދަ ކީރިތިވަންތަ މާތް ﷲ ވަހީ ކުރެއްވާފައިވެ އެވެ.
"ތިޔަބައި މީހުން ﷲ އަށް ކާފިރުވެގަންނަނީ، ކޮންގޮތަކުން ހެއްޔެވެ؟ ތިޔަ ބައި މީހުން މަރުވެފައިވާ ބައެއްގެ ގޮތުގައި ތިއްބައި، ފަހެ، އެކަލާނގެ ތިޔަ ބައި މީހުން (އުފައްދަވައި) ދިރުއްވި އެވެ. އެއަށް ފަހު، އެކަލާނގެ ތިޔަ ބައި މީހުންގެ (އަޖަލު ހަމަވުމުން) މަރު ގަންނަވާނެތެވެ. ދެން، (ޤިޔާމަތް ދުވަހުން) ތިޔަ ބައި މީހުން ދިރުއްވ ނެތެވެ. ދެން އެކަލާނގެ ޙަޟްރަތަށް ތިޔަ ބައި މީހުން ރުޖޫޢަ ކުރައްވާނެތެވެ. (البقرة 28)
ހިތާމައެއް ދިމާވެ މާޔޫސްވެގެންދާ ވަގުތުގައި އަމިއްލަ އަށް މަރުވުމުގެ ވިސްނުން އަތުވެއްޖެ ހިނދު ތިބާ ހެއްދެވި ފަރާތް ހަނދުމަ ކުރާށެވެ. އެކަލާނގެއީ ތިބާ އަށް ހެޔޮމަގު ދެއްކެވުމަށް ކުޅަނދުންވަންތަ ރަހީމް ވަންތަ ރަސްކަލާނގެ އެވެ.
މާތް ﷲ ވަހީ ކުރައްވާފައިވެ އެވެ.
"އަދި ތިޔަ ބައި މީހުންގެ އަމިއްލަ ނަފްސުތައް ތިޔަ ބައި މީހުން ޤަތުލު ނުކުރާށެވެ. ހަމަކަށަވަރުން، ތިޔަ ބައި މީހުންގެ މައްޗަށް ރަޙީމް ވަންތަ ރަސްކަލާނގެ ކަމުގައި ﷲ ވޮޑިގެންވެ އެވެ." (النساء 29)
ﷲގެ އަޅާ އެވެ. ﷲ އަށް ބިރުވެތިވާށެވެ. އީމާންތެރިކަން ގަދަކުރުމަށް ފަސް ނަމާދު ޤާއިމް ކުރާށެވެ. ކުފުރުގެ މަގު އިހުތިޔާރު ކުރުމުން ދުރުވެގަންނާށެވެ. ދިރ އުޅުމުގެ ކޮންމެ މަރުޙަލާއަކީ ތިބާ އަށް ކުރިމަތިވާ އިމްތިހާނެއްކަން ހަނދާން ކުރާށެވެ. އަދި މި އިމްތިހާނުގައި ތިބާ ފާސްވުމަށްޓަކައި ގަދައަޅައި މަސައްކަތް ކުރާށެވެ.
އަމިއްލަ އަށް މަރުވުމަކީ އަޅުގަނޑުމެންގެ މާތްވެގެންވާ އިސްލާމް ދީނުގައި ވަރަށް ބޮޑަށް ކޯފާލެއްވިގެންވާ ހަރާމް ކަމެއްކަން ދަންނާށެވެ. އަދި އެއީ ބޮޑުވެގެންވާ ފާފައިގެ ތެރެއިން ފާފައެއްކަން ހަނދާން ނައްތާނުލާށެވެ. އަމިއްލަ އަށް މަރު އިހުތިޔާރު ކުރަން ވިސްނާމީހާ ދަންނާށެވެ. މިއީ ތިބާ އަށް ދާއިމީ އަޒާބު ލިބެނިވި ކަމެކެވެ.
ﷲ ވަހީ ކުރެއްވި އެވެ.
"އަދި ގަސްދުގައި މުއުމިނަކު މަރާ މީހާ ދަންނާށެވެ. ފަހެ، އެމީހާގެ ޖަޒާއަކީ ނަރަކަ އެވެ. އެތާނގައި އަބަދަށް ދެމި ހުންނަނިވި ގޮތުގަ އެވެ. އަދި، ﷲ އެ މީހާގެ މައްޗަށް ކޯފާލައްވައި ލައުނަތް ލެއްވި އެވެ. އަދި ބޮޑުވެގެންވާ އަޒާބު އެ މީހާ އަށް ތައްޔާރު ކުރެއްވި އެވެ."
މާތް ﷲ އަޅަމެންގެ މި މުޖްތައު މިފަދަ ކުށްފާފަތަކުން ދުރުކުރައްވައި އަޅަމެންނަށް ހެޔޮމަގު ދައްކަވައި އަޅަމެންނަށް ސުވަރުގޭގެ މަތިވެރި ނިއުމަތް ދެއްވާފާނދޭވެ. އާމީން!