Last Updated: April 3, 22:50
Thursday, April 3, 2025
ޚަބަރު

ހިޖުރަ ކުރާ ދޫނި ހިފާ ނަމަ ޖޫރިމަނާ ކުރަނީ

ދުނިޔޭގެ އެކި ހިސާބުތަކުން ގިނަ އަދަދެއްގެ ދޫނި މި ދުވަސްވަރު ރާއްޖެއަށް ހިޖުރަ ކުރަމުންދާ އެއިން ދޫންޏެއް ހިފައިފި ނަމަ ފިޔަވަޅު އަޅާނެ ކަމުގެ އިންޒާރު އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން ދީފި އެވެ.

ހިޖުރަ ކުރާ ދޫނިތަކުގެ ތެރޭގައި ހިމާޔަތްކޮށްފައިވާ ބާވަތްތަކުގެ ދޫނި ވެސް ހިމެނެ އެވެ. އޭގެ ތެރޭގައި އިރުވާހުދާއި ފްލެމިންގޯ ފަދަ ދޫނި ހިމެނެ އެވެ. އަދި އެފަދަ ދޫނި ހިފުމަކީ ގާނޫނުގެ ދަށުން މަނާ ކަމެކެވެ.

އީޕީއޭ އިން ނެރުނު ބަޔާނެއްގައި ބުނީ ރާއްޖެ އަށް ހިޖުރަ ކުރާ މިފަދަ ދޫނި ބައެއް މީހުން ހިފައި، އެއަށް ގޯނާކުރާ ކަމަށާއި މިއީ އެ އެޖެންސީން ވަރަށް ކަންބޮޑުވާ ކަމެއް ކަމަށް ވެސް ބުންޏެވެ.

"ނަމަވެސް ކޮންމެ އަހަރަކު މި ދުވަސްވަރުގައި ވަރަށް ގިނަ ފަރާތްތަކުން މިފަދަ ދޫނި ހިފާ، ހައްޔަރުކޮށް ދޫންޏަށް ގޯނާ ކުރަމުންދާތީ، މިކަމަކީ މި އެޖެންސީން ނުހަނު ކަންބޮޑުވާ އަދި ހިތާމަ ކުރާ ކަމެކެވެ." ބަޔާނުގައި ބުންޏެވެ.

އީޕީއޭ އިން ބުނީ ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހެދިފައިވާ "ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއ ބަދަލު ހޯދުމުގެ ޤަވާޢިދު" އާއި "ދިވެހި ރާއްޖެ އަށް ހިޖުރަ ކުރާ ދޫނި ހިފައި، ގެންގުޅުމާ ބެހޭ ގަވާއިދު" ގެ ދަށުން ޖޫރިމަނާ ކުރާނެ ކަމަަށެވެ.