ކަންގަނާ ރަނާވަތު އެންމެ ފަހުން ރިލީޒްވި ދެ ފިލްމް ވެސް ބޮޑު ފްލޮޕަކަށްވެފައި ވަނިކޮށް، ވަރުގަދަ ޑައިރެކްޓަރެއްގެ ފިލްމެއް އޭނާ އަށް އަނެއްކާ ވެސް ލިބިއްޖެ އެވެ.
ތިން ފަހަރަށް ނެޝަނަލް އެވޯޑް ހޯދާފައިވާ ބަތަލާ އަށް މި ފަހަރު ލިބިފައި ވަނީ "މިސްޓަ އިންޑިއާ" އާއީ "މާސޫމް" ފަދަ ފިލްމްތައް ބެލުންތެރިންނާ ހަމައަށް ގެނެސް ދިން ޝޭކަރް ކަޕޫރްގެ ފިލްމެކެވެ.
ގޯއާގައި މިހާރު ކުރިއަށްދާ އިންޓަނެޝަނަލް ފިލްމް ފެސްޓިވަލް އޮފް އިންޑިއާ (އައެފްއެފްއައި) ގެ މާސްޓާ ކްލާހުގައި ވާހަކަ ދައްކަމުން ޝޭކަރް ބުނީ ކަންގަނާ ލީޑް ރޯލަށް ލައިގެން ހަދަން ނިންމާފައިވާ ފިލްމް އަދި އޮތީ ސްކްރިޕްޓިން މަރުހަލާގައި ކަމަށެވެ. އޭނާ ބުނީ އެ ފިލްމްގައި ހުނަރުވެރި ބަތަލާ ކުޅޭނީ 85 އަހަރުގެ އަންހެނެއްގެ ކެރެކްޓާއެއް ކަމަށެވެ.
"އަހަރެން މި ހުރީ އިންޑިއާގައި ފިލްމެއް ހަދަން ކެތްމަދުވެފައި. ކަންގަނާ ލައިގެން ހަދާ ފިލްމްގެ ސްކްރިޕްޓްގެ މަސައްކަތް މިހާރު ކުރަމުން މި އަންނަނީ،" ސުޝާންތު ސިންގް ރާޖޫޕޫތާ އެކު "ޕާނީ" ގެ ނަމުގައި ފިލްމެއް ލޯންޗް ކުރި ނަމަވެސް ހުއްޓިފައިވާ ފިލްމްގެ ޑައިރެކްޓަރު ބުންޏެވެ.
ޝޭކަރްއަކީ ހޮލީވުޑްގެ ފިލްމްތައް ވެސް ހަދާފައިވާ ޑައިރެކްޓަރެކެވެ. އޭގެ ތެރޭގައި އެލިޒަބަތު (1998)، އެލިޒަބަތު: ދަ ގޮލްޑެން އޭޖް (2007) އަދި ޕެސެޖް (2009) ހިމެނެ އެވެ.
ކަންގަނާ ލައްވައި އުމުރުން ދުވަސްވީ މީހެއްގެ ރޯލް ކުޅުވަން ޝޭކަރް ނިންމި އިރު، ކަންގަނާ އަމިއްލަ އަށް ޑައިރެކްޓް ކުރަން ނިންމާފައިވާ ފިލްމް "ތޭޖޫ" ގައި ވެސް އޭނާ ކުޅޭނީ އުމުރުން ދުވަސްވީ އަންހެނެއްގެ ރޯލެވެ.
މި އަހަރު ރިލީޒް ކުރި "ސިމްރަން" އާއި "ރަންގޫން" އަށް ފަހު، ކަންގަނާ މިހާރު އަންނަނީ "މަނިކަރްނިކާ" ކިޔާ ތާރީހީ ފިލްމެއް ކުޅެމުންނެވެ.