އަދާލަތު ޕާޓީގެ ރައީސް ޝެއިހް އިމްރާން އަބްދުﷲ 12 އަހަރަށް ޖަލަށްލުމަށް ކްރިމިނަލް ކޯޓުން ހުކުމް ކުރީ ރަނގަޅަށް ކަމަށް ނިންމައި އެ މައްސަލައިގެ އިސްތިއުނާފު ބަލައިގަނެވެން ނެތް ކަމަށް ސުޕްރީމް ކޯޓުން އަންގައިފި އެވެ.
ދެހާސް ފަނަރަ ވަނަ އަހަރު ބޭއްވީ މޭޑޭ މުޒާހަރާގައި އިމްރާން ދެއްކެވި ވާހަކަތަކާ ގުޅިގެން ކުރި ދައުވާ ސާބިތުކޮށް އޭނާގެ މައްޗަށް އިމްރާން 12 އަހަރުގެ ޖަލު ހުކުމެއް ކްރިމިނަލް ކޯޓުން އިއްވީ ފެބްރުއަރީ، 16، 2016 ގަ އެވެ. އެ ހުކުމަށް ހައިކޯޓުން ތާއީދު ކުރީ އޭޕްރީލް 23، 2017 ވަނަ ދުވަހުއެވެ.
ސުޕްރީމް ކޯޓުގެ ރަޖިސްޓްރާ ސޮއި ކުރައްވައި އިމްރާންގެ ވަކީލުންނަށް ފޮނުވާފައިވާ އިސްތިއުނާފު ކުރުމުގެ ހުއްދަ އަށް އެދޭ މައްސަލަ ނިންމިގޮތުގެ ލިޔުމުގައި ބުނެފައި ވަނީ ސުޕްރީމް ކޯޓުގައި އިލްތިމާސަށް ހުށަހެޅި ސަބަބުތަކަށް ބެލި އިރު، ހައި ކޯޓްގެ ހުކުމް ރަނގަޅު ނޫން ކަމަށް ބަލަން ޖެހޭ އެއްވެސް އަސާސެއް ނެތް ކަމަށެވެ.
އަދި އެ ކޯޓުންކޮށްފައިވާ ހުކުމަކީ ޝަރުއީ އަދި ގާނޫނީ އުސޫލުތަކާ އެއްގޮތަށް ކޮށްފައިވާ ހުކުމެއް ކަމަށާއި ހުކުމަށް ބަދަލު ގެންނަން ޖެހޭ ފަދަ ޝަރުއީ އަދި ގާނޫނީ އެއްވެސް ސަބަބެއް ނެތް ކަމަށް ވެސް އެ ލިޔުމުގައިވެ އެވެ.
އެހެންވެ ކޯޓުތަކުގެ ގާނޫނުގެ 16 ވަނަ މާއްދާ އާއި ސުޕްރީމް ކޯޓުގެ ގަވާއިދުގެ 42 ވަނަ މާއްދާގެ ދަށުން އިސްތިއުނާފު ކުރުމުގެ ހުއްދަ ދޭންޖެހޭ މައްސަލައަކަށް ނުވާތީ މައްސަލަ ބަލައި ނުގަތުމަށް ސުޕްރީމް ކޯޓުގެ ފަނޑިޔާރުންގެ މަޖިލީހުން ނިންމާފައިވާ ކަމަށް އެ ބުނެފައިވެ އެވެ.