އެމްޑީޕީގެ ދާއިރާތައް ހަރަކާތްތެރިކަމާ އެކު ރިޔާސީ ކެމްޕެއިންގެ ވިއުގަ ފުރިހަމަ ކުރެއްވުމަށް އެމްޑީޕީގެ ލީޑަޝިޕުން މަޝްވަރާކޮށްފި އެވެ.
މިހާތަނަށް ކަންތައްތައް ހަމަޖައްސަވަމުން ގެންދަވާ މައުލޫމާތު އެމްޑީޕީގެ ގައުމީ ހިންގާ ކޮމިޓީގެ ބައެއް މެމްބަރުންނަށް ދެއްވީ ރިޔާސީ ކެމްޕެއިން މެނޭޖަރު އަދި އެމްޑީޕީ ޗެއަޕާސަންގެ ނާއިބު އިދާރީ ޢަލީ ޝިޔާމެވެ.
މިއަދު ބޭއްވި ބައްދަލުވުމުގައި އެމްޑިޕީގެ ރިޔާސީ ކެންޑިޑޭޓް ކުރީގެ ރައީސް މުހަންމަދު ނަޝީދު އެދިވަޑައިގެންނެވީ ރިޔާސީ ކެމްޕެއިންގެ ވިއުގަ ފުރިހަމަކުރެއްވުމުގައި ޕާޓީގެ ދާއިރާތަކުގެ ހަރަކާތްތެރިކަން ވެލެއްވި އެންމެ ފުޅާ ދާއިރާއެއްގައި ބައިވެރި ކުރެއްވުމަށެވެ.
ރިޔާސީ ކެމްޕެއިން ގެ އިސް ހަރަކާތްތެރިންނަކީ ދާއިރާތަކަށް މިހާރު ކެމްޕެއިންޓީމުން ކަނޑައަޅުއްވާފައި ތިއްބެވި ކޯޑިނޭޓަރުން ކަމަށާއި، ރިޔާސީ ކެމްޕެއިން ޓީމްގެ ވިއުގަ ފުރިހަމަ ކުރެއްވުމުގައި އެ ދާއިރާއެއްގައި ހަރަކާތްތެރިކަމާ އެކު މަސައްކަތްކޮށް ދެއްވާ ޕާޓީގެ މަސައްކަތްތެރިން ކަނޑައެޅުއްވުމުގެ އެންމެ ފަހުގެ ނިންމެވުން ނިންމަވާނީ ދާއިރާ ކޯޑިނޭޓަރުން ކަމަށް މެމްބަރުން ފާހަގަ ކުރެއްވި އެވެ.
އެމްޑީޕީގެ މެމްބަރުން އެމެމްބަރުންނަށް ނޭނގި ގަވާއިދާ ޚިލާފަށް އެހެން ޕާޓީ ތަކަށް ބަދަލުކުރައްވާކަން ފާހަގަ ކުރެއްވިފައިވާ ކަމަށާއި އެބާވަތުގެ ކަންކަން ހުއްޓުވުމަށް އެޅުއްވެން ހުރި ހުރިހާ ފިޔަވަޅެއް އަޅުއްވާނެ ކަމުގައި އެމްޑީޕީގެ ގައުމީ ހިންގާ ކޮމިޓީގެ ބައެއް މެމްބަރުންގެ މި ބައްދަލުވުމުގައި ޗެއަޕާސަން މޫސާ މަނިކު ވިދާޅުވި އެވެ.
.
ރިޔާސީ ކެމްޕެއިންގެ މަސައްކަތްތައް މިހާރު ހަލުވިކަމާ އެކު ކުރިއަށްދާތީ އާއި މެނިފެސްޓޯ އެކުލަވާލުން ނިމުމަކާ ގާތްވެފައިވާތީ، ޕާޓީގެ ޓުއަރިޒަމާއި ގެސްޓް ހައުސް ސިޔާސަތާއި، މަސްވެރިކަމާއި، ދަނޑުވެރިކަމާ އެފަދަ މައިގަނޑު ދާއިރާތަކުގެ ސިޔާސަތުތައް ކުރިއަށް ނެރުއްވުމަށް މެމްބަރުން މަޝްވަރާ ކުރެއްވި އެވެ.