ބޮލީވުޑްގެ އެކްޓަރުންގެ ތެރެއިން މިހާރު އެންމެ ކާމިޔާބު ޒުވާން އެކްޓަރު ވަރުން ދަވަން ފިލްމެއް ކުޅެދޭ އަގު 13 ކްރޯޑް ރުޕީސް އަށް ބޮޑުކޮށްފި އެވެ.
މިހާތަނަށް ކުޅުނު އެއްވެސް ފިލްމެއް ފްލޮޕްވެފައި ނުވާ އެކްޓަރު، ކުރިން ފިލްމެއް ކުޅެދެނީ 8 ކްރޯޑް ރުޕީސްއަށެވެ. ނަމަވެސް ފުލުފުލުގައި ހިޓްތައް ގެނެސްދޭ އެކްޓަރު މިހާރު ވަނީ ފިލްމް ކުޅެދޭ އަގަށް 5 ކްރޯޑް އިތުރުކޮށް، އަގު 13 ކްރޯޑް ރުޕީސް އަށް މައްޗަށް ޖައްސާލައިފި އެވެ.
ރިޕޯޓްތައް ބުނާ ގޮތުން ވަރުން، 30، ފިލްމް ކުޅެދޭ އަގު ބޮޑު ކުރަން ނިންމީ އޭނާ ފިލްމީ ދާއިރާ އަށް ނެރެދިން ޑައިރެކްޓަރު/ޕްރޮޑިއުސަރު ކަރަން ޖޯހަރްގެ ލަފާގެ މަތިންނެވެ.
ކަރަންގެ "ސްޓޫޑަންޓް އޮފް ދި އިޔާ" އިން 2012 ގައި ބޮލީވުޑަށް ނިކުތް ވަރުންގެ އެންމެ ފަހުގެ ފިލްމް "ޖުޅްވާ 2" އަކީ ވެސް މި އަހަރުގެ އެންމެ ބޮޑު އެއް ހިޓެވެ.
މިހާތަނަށް ޖުމްލަ ނުވަ ފިލްމް ބެލުންތެރިންނާ ހަމައަށް ގެނެސް ދީފައިވާ އެކްޓަރުގެ ކުރިއަށް ހުރި ފިލްމްތަކުގެ ތެރެއިން ދެން އެންމެ އަވަހަށް ސިނަމާ އަށް އަންނާނީ އަންނަ އަހަރުގެ އެޕްރީލްގައި ރިލީޒް ކުރާ "އޮކްޓޯބާ" އެވެ.
މީގެ އިތުރުން "ސުއީ ދާގާ: މޭޑް އިން އިންޑިއާ" އަކީ އަންނަ އަހަރު ރިލީޒް ވާނެ ވަރުންގެ ފިލްމެކެވެ. މި ފިލްމަކީ ކުޅަދާނަ ބަތަލާ އަނުޝްކާ ޝަރްމާ އާއި ވަރުންގެ ޖޯޑު ފުރަތަމަ ފަހަރަށް ސްކްރީނުން އެކުގައި ފެނިގެން ދާނެ ފިލްމެވެ.