މި މަހުގެ 15 ވަނަ ދުވަހުގެ ރޭ ބާއްވާ ރާއްޖެ ޓީވީ ނައިޓްގެ ބައިވެރިވާން އިންޑިއާގެ ޓީވީ ތަރި އަންކިތާ ލޯކަންދޭ ރާއްޖެ އަންނަ ގޮތަށް ހަމަޖެހިއްޖެ އެވެ.
އަންކިތާ އާންމުންގެ ތެރޭގައި އެންމެ ބޮޑަށް މަޝްހޫރުވެގެން ދިޔައީ މީގެ އަހަރުތަކެއް ކުރިން ޒީ ޓީވީން ދެއްކި ކާމިޔާބު ޑްރާމާ ސިލްސިލާ "ޕަވިތުރަ ރިޝްތާ" އިންނެވެ. އެ ސިލްސިލާގައި އޭނާއާ އެކު ބަތަލުގެ ރޯލް ކުޅުނު ސުޝާންތު ސިންގް ރާޖްޕޫތްއާ ގިނަ ދުވަސްތަކެއް ވަންދެން ރައްޓެހިވެގެން އުޅުމަށް ފަހު، އެ ދެ މީހުން ވަކިވީ 2014 ގެ ތެރޭގަ އެވެ.
ކައިވެންޏަށް ވެސް ތައްޔާރުވަމުން ދަނިކޮށް އަންކިތާ އާއި ސުޝާންތު ވަކިވީ، ސިލްސިލާތައް ކުޅުން ހުއްޓާލައި، ސުޝާންތު ބޮލީވުޑްގެ މަޝްހޫރު އެކްޓަރަކަށް ވެސް ވި ފަހުންނެވެ.
އެ ދެ މީހުން އެކުގައި ވަނީ މަޝްހޫރު ޑާންސް ޝޯ "ޖަލަކް ދިކްލާޖާ" ގައި ވެސް ވާދަކޮށްފަ އެވެ.
އަންކިތާ، 32، މިހާރު އަންނަނީ ބޮލީވުޑް ފިލްމެއް ވެސް ކުޅެމުންނެވެ. އެއީ ކަންގަނާ ރަނާވަތުގެ ތާރީހީ ފިލްމް "މަނިކަރްނިކާ" އެވެ.
މިދިޔަ އަހަރު ރާއްޖެ ޓީވީން ވަނީ އިންޑިއާގެ ލަވަ ކިޔުންތެރިއަކު ވެސް ރާއްޖެ ގެނެސް، އެ ޗެނެލްގެ ނައިޓްގައި ޕަފޯމް ކުރުވައިފަ އެވެ. އެއީ އަދިތިޔާ ނާރަޔަން އެވެ.